Alibaba yeni Zhenwu V900 süni intellekt sürətləndiricisini təqdim edib və onu Çində hazırlanmış ən güclü çip adlandırıb. Yeni modelin məhsuldarlığı əvvəlki versiyadan üç dəfə yüksəkdir. Çipləri qabaqcıl süni intellekt modellərinin öyrədilməsi üçün 500 minədək prosessordan ibarət klasterlərdə birləşdirmək mümkündür.
Təqdimat investorların Çin şirkətlərinin ABŞ-nin ixrac məhdudiyyətləri fonunda Nvidia-dan asılılığını azalda biləcəyinə dair ümidlərini gücləndirib.
Dünən Nyu-York birjasında keçirilən ticarətin yekununda Alibaba-nın Amerika depozitar səhmləri (ADS) 2,2% bahalaşıb. Premarketdə isə səhmlər daha 4,6% yüksəlir.
Yeni çip qarşıdakı illərdə Alibaba-nın qlobal infrastrukturunun genişləndirilməsinin əsasını təşkil etməlidir. Şirkət üç il ərzində süni intellektin inkişafına 53 milyard dollardan çox sərmayə yatırmağı və 2032-ci ilədək Alibaba Cloud-un dünya üzrə məlumat mərkəzlərinin ümumi gücünü 20 giqavata çatdırmağı planlaşdırır.
Layihə qlobal süni intellekt sənayesində ən iri infrastruktur təşəbbüslərindən birinə çevrilə bilər. Bir ay əvvəl şirkət bu məqsədlər üçün əlavə səhm yerləşdirilməsi vasitəsilə təxminən 10,2 milyard dollar cəlb etmişdi.
Citigroup-un hesablamalarına görə, belə miqyasda infrastruktur Alibaba-nın bulud bölməsinə xarici müştərilərdən 160 milyard dollardan çox gəlir gətirə bilər.
Bununla belə, hətta belə iri layihə bəzi xarici təşəbbüslərdən geri qalır. Məsələn, Yaponiyanın SoftBank investisiya holdinqi yalnız ABŞ-nin Ohayo ştatında 10 giqavat gücündə hesablama kompleksi tikməyi planlaşdırır.
Alibaba həmçinin bir sıra Amerika şirkətlərinin daha ehtiyatlı yanaşma çağırışlarına baxmayaraq, süni intellektin inkişaf tempini azaltmaq niyyətində olmadığını təsdiqləyib.
“Süni intellekt nə qədər mükəmməl olarsa, bəşəriyyət bir o qədər çox imkan əldə edər”, – Vu əvvəlki mövqeyini bir daha təsdiqləyərək bildirib.
Alibaba Zhenwu V900 çipini hansı şirkətin istehsal edəcəyini və yaxın zamanda kifayət qədər çip istehsalını təmin edib-etməyəcəyini açıqlamayıb.
ABŞ-nin məhdudiyyətləri Çin tərtibatçılarının TSMC-nin qabaqcıl istehsal güclərinə çıxışını faktiki olaraq bağlayır. Ölkə daxilində ən böyük çip istehsalçısı olan SMIC isə artıq mövcud istehsal güclərinin çatışmazlığı ilə üzləşir.
Bununla belə, məlumdur ki, Alibaba-nın T-Head bölməsi indiyədək Zhenwu ailəsinə daxil olan 560 min çip tədarük edib. Şirkətin prosessorlarından 400-dən çox xarici müştəri istifadə edir.
Alibaba cari rübdə süni intellekt məhsullarından əldə olunan gəlirin illikləşdirilmiş hesabla 10 milyard dollara çatacağını gözləyir.
Şirkət beş il ərzində bulud və süni intellekt biznesinin illik gəlirini beş dəfə artıraraq 100 milyard dollara çatdırmağı planlaşdırır.
Rəhbərliyin hesablamalarına görə, infrastruktura yatırılan investisiyalar təxminən üç il ərzində özünü doğrulda bilər. Bununla belə, genişmiqyaslı investisiya proqramı artıq şirkətin maliyyə nəticələrinə ciddi təzyiq göstərir.
Son rübdə Alibaba-nın xalis mənfəəti 75% azalaraq 1,54 milyard dollara düşüb. Eyni dövrdə kapital xərcləri 75% artaraq təxminən 10 milyard dollara çatıb.
