ABŞ prezidenti Donald Tramp ölkənin BMT-nin İnsan Haqları Şurasından çıxması ilə bağlı sərəncam imzalayıb. ABŞ prezidenti həmçinin BMT-nin Yaxın Şərqdəki Fələstinli Qaçqınlara Yardım və İşləri üzrə Agentliyinin (UNRWA) gələcək maliyyələşdirilməsini dayandırıb.
2018-ci ildə Donald Trampın ilk prezidentliyi dövründə də ABŞ BMT Şurasından çıxıb. Həmin vaxt bu qərar təşkilatın digər üzvlərinin İsraillə bağlı tənqidləri ilə razılaşmaması ilə bağlı olub. Eyni zamanda, cənab Tramp aydınlaşdırıb ki, ABŞ-nin təşkilatdan geri çəkilməsi “insan haqları öhdəliklərindən geri çəkilmək” demək deyil.
ABŞ-nin keçmiş prezidenti Co Baydenin administrasiyası 2024-cü ilin yanvarında UNRWA-ya maliyyəni dayandırıb. İsrail agentliyin bəzi əməkdaşlarının islamçı qruplarla, o cümlədən Fələstinin HƏMAS hərəkatı ilə əlaqəli olduğunu iddia edir. Agentliyin İsrail ərazisində fəaliyyətini qadağan edən qanun yanvarın 30-da qüvvəyə minib.
