2024-cü ildə ABŞ-də 1000-dən çox şəxsin fərdi pensiya hesabında (IRA) ən azı 25 milyon ABŞ dolları olub. Bu göstərici 2019-cu illə müqayisədə iki dəfədən çox artıb. Bu barədə The Wall Street Journal Konqresin Vergitutma üzrə Birləşmiş Komitəsinin məlumatlarına istinadən xəbər verir.
Hesabında 10 milyon ABŞ dolları və ya daha çox vəsait olan IRA sahiblərinin sayı da artaraq təxminən 11,6 min nəfərə çatıb. 2019-cu ildə bu göstərici cəmi 3625 nəfər idi.
WSJ-nin həmsöhbəti olan ekspertlər bildirirlər ki, pensiya yığımlarının kəskin artımı bir çox amerikalının yüksək texnologiyalar sahəsində fəaliyyət göstərən startaplara uğurlu investisiyalar yatırması ilə bağlıdır. Məsələn, videooyun istehsalçısı Roblox 2021-ci ildə IPO keçirərək səhmlərini hər biri 45 ABŞ dollarından yerləşdirmişdi. 2025-ci ilin sentyabrında isə şirkətin səhmləri artıq 135 ABŞ dollarına satılırdı.
Bundan əlavə, Nasdaq Composite yüksək texnologiyalar indeksi 2019-cu ildən bəri təxminən 7 min bənddən 25,8 min bəndədək yüksəlib. Nəticədə texnologiya şirkətlərinin səhmlərinə investisiya edən bir çox IRA hesabı sahibi əhəmiyyətli gəlir əldə edib.
Bununla belə, bu cür pensiya hesabları üzrə vergi dərəcələri aşağı səviyyədə qalır. Çünki onlar ilkin olaraq adi vətəndaşların pensiya üçün vəsait toplamasına kömək etmək məqsədilə yaradılmışdı.
Lakin WSJ qeyd edir ki, getdikcə daha çox siyasətçi və tənzimləyici orqan IRA hesablarına tətbiq olunan vergi siyasətinin dəyişdirilməsinin zəruri olduğunu bildirir. Onların fikrincə, bu hesablar aşağı vergi üstünlüklərindən istifadə etməklə investisiya aparan varlı investorlar arasında getdikcə daha populyar alətə çevrilir.
