ABŞ dolları bazar ertəsi ticarət sessiyasında avroya qarşı sabit qalır, funt sterlinq və yapon yeninə qarşı isə bir qədər güclənir.
Dolların altı əsas valyutaya (avro, İsveçrə frankı, yena, Kanada dolları, funt sterlinq və İsveç kronu) qarşı dinamikasını göstərən ICE DXY indeksi 0,07% azalıb, daha geniş WSJ Dollar Index isə 0,01% yüksəlib.
DXY indeksi son üç ayın maksimum səviyyəsinə yaxın qalır. Bu, ABŞ Federal Ehtiyat Sistemi (FED) tərəfindən dekabrda əsas faiz dərəcəsinin azaldılacağına dair gözləntilərin zəifləməsi ilə bağlıdır. Keçən həftə ABŞ Mərkəzi Bankı dərəcəni 25 baza bəndi azaldaraq illik 3,75–4% aralığına endirib. Lakin FED sədri Cerom Pauell mətbuat konfransında bildirib ki, dekabrda daha bir azalma hələlik açıq sualdır və zəmanətli deyil.
Faiz dərəcəsi fyuçerslərinin kotirovkalarına əsasən, treyderlər dekabr iclasında dərəcənin 25 baza bəndi azaldılma ehtimalını 69,3% səviyyəsində qiymətləndirirlər — bu, Pauellin açıqlamalarından əvvəlki 90%-lik ehtimalla müqayisədə azdır.
Cümə günü FED rəhbərliyinin iki üzvü yaxın vaxtlarda pul-kredit siyasətinin daha da yumşaldılmasına ehtiyac görmədiklərini bildirdilər. Kanzas-Siti Federal Ehtiyat Bankının rəhbəri Ceffri Şmid (oktyabr iclasında dərəcənin dəyişməməsi lehinə səs verib) qeyd edib ki, dərəcənin azaldılması əmək bazarına əhəmiyyətli dəstək verməyəcək, lakin inflyasiyaya uzunmüddətli təsir göstərə bilər.
ABŞ-də hökumətin maliyyə böhranı (şatdaun) davam etdiyindən bir çox statistik məlumatlar hələ də dərc edilmir. Bu həftə bazar iştirakçıları müstəqil ADP təşkilatının əmək bazarı hesabatını, eləcə də Təchizat İdarəetmə İnstitutu (ISM) tərəfindən hesablanan istehsal (ISM Manufacturing) və xidmət sektoru (ISM Services) fəaliyyət indekslərini gözləyirlər.
Saat 10:15-ə olan məlumata görə, avro/dollar cütlüyü əvvəlki sessiyanın bağlanışı olan $1,1539 səviyyəsi ilə müqayisədə $1,1538 səviyyəsində ticarət olunur. Funtun dollara qarşı məzənnəsi isə cümə günkü $1,3151-dən $1,3143-ə enib.
ABŞ dollarının yenə qarşı məzənnəsi əvvəlki ticarət sessiyasındakı 154,01 yen səviyyəsindən 154,19 yenə yüksəlib. Dollar/ofşor yuan cütlüyü isə əvvəlki günün 7,1224 yuan səviyyəsi ilə müqayisədə 7,1179 yuan səviyyəsində ticarət olunur.
