Dolların daha da ucuzlaşmağa hazır olduğu və Federal Ehtiyat Sisteminə (FED) yeni sədr təyin olunmasının – xüsusilə də faiz dərəcələrini tez bir zamanda endirməyə meyilli bir şəxsin seçilməsinin – bu prosesə təkan verə biləcəyi bildirilir.
Banker.az xəbər verir ki, bu barədə “DoubleLine Capital” investisiya şirkətinin portfel meneceri Bill Kampbell məlumat verib.
“Dolların daha da ucuzlaşması üçün hələ də geniş imkanlar mövcuddur,” – deyə Kampbell bildirib. “DoubleLine Capital”ın 2024-cü ilin sentyabrına olan vəziyyətə görə idarə etdiyi aktivlərin dəyəri 95 milyard dollar təşkil edirdi.
2025-ci ilə pis başlanğıcdan sonra ABŞ dolları iyul ayında bu il ilk dəfə ayı yüksəlişlə tamamlayıb. Lakin Kampbell ABŞ-ın böyük büdcə kəsirləri və investorların regionlar üzrə diversifikasiya siyasəti fonunda dolların çoxillik eniş mərhələsinə daxil olduğu fikrində qalır. Bloomberg-in spot dollar indeksi isə ABŞ xidmət sektoruna dair zəif statistikadan sonra çərşənbə axşamı 0.1% geriləyib.
Dollar üçün əsas risklərdən biri prezident Donald Trampın borclanma xərclərini azaltmaq (uçot faiz dərəcəsi) istiqamətindəki səyləridir. Tramp FED sədri Cerom Pauellə dəfələrlə açıq şəkildə tənqidlər və hətta təhqirlər səsləndirib. Bu isə mərkəzi bank funksiyasında olan FED-in müstəqilliyi ilə bağlı suallar doğurur.
Tramp yaxın günlərdə Adriana Kuglerin boşalan yerinə yeni FED sədrinin təyin ediləcəyini açıqlayıb. Kugler ötən həftə istefa verəcəyini bəyan edib. Yeni üzvün Trampın aşağı faiz dərəcələri üzrə prioritetlərinə daha yaxın mövqedə ola bilər və Pauellin səlahiyyət müddəti 2025-ci ilin mayında bitdikdə sədr postuna keçə bilər. Tramp Pauelli vəzifəsindən azad etmək niyyətində olduğunu isə inkar edib.
Kampbellin fikrincə, ABŞ iqtisadiyyatının zəifləməsi də dolların dəyərinə mənfi təsir göstərə bilər. Belə ki, son hesabatda ABŞ xidmət sektorunun inam indeksinin iyul ayında zəiflədiyi və bütün iqtisadçı proqnozlarını geridə qoyduğu bildirilib. İyulda ABŞ xidmət sektoru demək olar ki, dayanma nöqtəsinə gəlib – zəif tələbat və artan xərclər fonunda şirkətlər işçi sayını azaldıblar.
Bu, ötən həftə əmək bazarı ilə bağlı açıqlanan və əvvəlki qiymətləndirmələrdən xeyli zəif nəticələri əks etdirən statistik məlumatlardan və FED-in üstünlük verdiyi inflyasiya göstəricisinin iyunda artdığını göstərən hesabatdan sonra baş verib.
İqtisadi artımın zəifləməsi, ABŞ hökumətinin maliyyə kursunu düzəltməsini daha da çətinləşdirəcək. Kampbell son dövrlərdə dolların nisbi sabitliyindən istifadə edərək, zəifləmə istiqamətində mövqe tutduğunu və inkişaf etmiş və inkişaf etməkdə olan ölkələr üzrə dollar olmayan istiqrazlara yatırımlarını artırdığını bildirib. Dollar indeksi bu ilin əvvəlindən bəri ümumilikdə 7%-dən çox dəyər itirib.
Kampbellin əsas narahatlığı isə ABŞ iqtisadiyyatının yenidən “fövqəladə inkişaf” yoluna qayıtmasıdır. Əgər fiskal siyasətdə düzəlişlər və ticarət siyasətində sabitlik ABŞ iqtisadiyyatını gücləndirsə, bu, dollar üçün müsbət amilə çevrilə və ABŞ aktivlərinə tələbatı artıra bilər.
Portfel meneceri əlavə edib ki, ABŞ-a sərmayə yatırmaqla bağlı Avropa İttifaqı və Yaponiya kimi ticarət tərəfdaşlarının verdiyi vədləri də diqqətlə izləyir. Bu vədlər dolların digər istiqamətlərə axınının qarşısını qismən ala bilər. Lakin bu sərmayələrin miqyası və vaxtı barədə ətraflı detallar hələlik məlum deyil.
“Bu məsələdə gözləmə mövqeyindəyəm,” – deyə Kampbell bildirib. “Ticarət sazişləri istisna olmaqla, düşünürəm ki, qlobal yığımların yenidən ABŞ-a yönəlməsi əvvəlki dövrlərlə müqayisədə daha yavaş olacaq.”
