Kanadanın Baş naziri Mark Karni və ABŞ prezidenti Donald Tramp polad, alüminium və enerji sahələrini əhatə edən ticarət sazişini Asiya-Sakit Okean İqtisadi Əməkdaşlığı (APEC) sammitində, oktyabrın sonunda imzalaya bilərlər. Bu barədə mənbələrə istinadən “The Globe and Mail” qəzeti məlumat verib.
Nəşrin məlumatına görə, bu saziş Kanadanın metallurgiya sənayesindəki çətinlikləri yüngülləşdirə bilər. Məqalə müəllifləri ABŞ-nin tətbiq etdiyi tarifləri bu sahədə ölkənin mövcud vəziyyətinə təsir edən əsas amillərdən biri kimi göstərirlər. Bununla belə, qeyd olunur ki, Vaşinqton avtomobil və ağac materialları (taxta məhsulları) üzrə razılaşmalar imzalamaq niyyətində deyil – halbuki bu məhsullar Kanadadan ABŞ-yə ixrac olunan ən vacib mallardır.
1 avqustdan etibarən Tramp Kanadadan idxal olunan mallara tətbiq edilən rüsumları 25%-dən 35%-ə qaldırıb. Bununla yanaşı, “35%-lik rüsumdan yayınmaq məqsədilə yenidən yüklənən” mallara 40%-lik tariflər tətbiq olunub.
Karni həmin qərardan sonra “X” sosial şəbəkəsində yazıb ki, hökumət ölkə sənayesinin rəqabət qabiliyyətini qorumaq və iş yerlərini təmin etmək üçün tədbirlər görəcək.
Lakin 1 sentyabrdan etibarən, ticarət balansındakı kəsir səbəbindən, Kanadanın ABŞ-yə qarşı tətbiq etdiyi bəzi cavab rüsumları ləğv edilib.
