Bəzi təşkilatlar, nüfuzlu jurnallar dəfələrlə onu Afrikanın ən zəngin qadını elan ediblər. Onu həm ağıllı, həm də güclü qadın adlandırırlar. 1973-cü ildə Bakıda dünyaya gələn İzabel duş Santuş indi ölkəsinin ən populyar qadınları siyahısında ilk yerlərdən birində qərarlaşır.
Yalnız öz ölkəsində və Afrika qitəsində deyil, Avropa və Asiyada da tanınan, Bakıda dünyaya gəlmiş İzabel duş Santuşun həyatı ilə bağlı maraqlı məqamları təqdim edir.
Vaxtilə Azərbaycan Neft Akademiyasının məzunu olmuş Anqola prezidenti Joze Eduard duş Santuşun bakılı Tatyana Kukanova ilə nikahından dünyaya gələn ilk övladı hələ uşaq yaşlarından etibarən iqtisadiyyat, müxtəlif maliyyə əməliyyatları ilə maraqlanır.
Cütlüyün bu nikahdan 3 övladı dünyaya gəlib.
Ötən əsrin 90-cı illərində Londona qayıdan İzabel burada alman şirkətində çalışmağa başlayıb. Daha sonra isə yükdaşıma biznesinə girişib.
Bu çabaların nəticəsidir ki, 1997-ci ildə artıq onun şəxsi biznesi vardı. Luandadakı ilk gecə klubu və çimərlik restoranı olan “Miami Beach Club” İzabelin gəlirlərini artırırdı.
Neft və almazı özünün kommersiya maraqlarına daxil etmiş bakılı qadın sement istehsalı ilə məşğul olan “Nova Cimangola” şirkətinin səhmdarına çevrildi. Portuqaliyada və ölkəsində bankların rəhbərliyində təmsil olunan İzabelin adı indi dünyanın ən güclü sərmayəçi qadınlarının siyahısında ilk yerlərdən birində qərarlaşıb.
Qeyd edək ki, bir müddət əvvəl “Forbes” jurnalı 42 yaşlı qadını Afrikanın ilk milyarder qadını elan edib.
publika.az
