ABŞ prezident administrasiyasının Ukraynadakı münaqişənin həlli ilə bağlı planı demək olar ki, tam şəkildə razılaşdırılıb. Bu barədə Ağ Evin mətbuat katibi Kerolayn Levitt “Fox News”a müsahibəsində bildirib. Onun sözlərinə görə, tərəflər arasında fikir ayrılığına səbəb olan cəmi bir neçə bənd qalıb. Buna baxmayaraq, ABŞ prezidenti Donald Tramp Rusiya və Ukrayna arasında razılaşmanın əldə oluna biləcəyinə ümid edir, deyə mətbuat katibi qeyd edib.
“Komandalarımızın üzərində işləməyə davam etdiyi cəmi bir neçə fikir ayrılığı qalıb, buna görə də prezident razılaşmanın mümkün olacağına ümidini qoruyub saxlayır”, — deyə xanım Levitt bildirib. O qeyd edib ki, ABŞ və Ukrayna arasında sülh razılaşması ilə bağlı “çox məhsuldar müzakirələr” aparılır.
Xanım Levitt qeyd edib ki, ABŞ-nin Rusiya və Ukraynaya hərbi əməliyyatların dayandırılması üçün təklif etdiyi planda 28 bənd var idi. Lakin dünən “Financial Times” xəbər verib ki, bu bəndlərin sayı 19-a endirilib. “Bloomberg”in məlumatına görə, yeni versiyada dondurulmuş rus aktivlərinin istifadəsi ilə bağlı müddəalar çıxarılıb.
