Avropa Komissiyası (AK) tətbiqi yeni imkanlar yaradan, lakin maliyyə sabitliyi üçün risk daşıyan kriptovalyutaların monitorinqi və onlara nəzarətin yeni metodların hazırlanmasına başlayıb.
Report agentliyi TASS-a istinadən xəbər verir ki, bu barədə Avropa Komissiyası rəhbərinin avro və sosial dialoq məsələləri üzrə müavini Valdis Dombrovskis cümə günü Avroqrupun Helsinkidə keçirilən qeyri-rəsmi görüşündən sonra bildirib.
“AK hazırda bu valyutaların Avropa İttifaqının mövcud tənzimləmə sisteminə nə dərəcədə uyğun olduğunu, Aİ-nin yeni xüsusi tənzimləmə tədbirlərinə ehtiyac duyub-dumadığını araşdırır. Məsələn, “Libra” elektron valyutasından danışırıqsa, bu valyutanın necə işləyəcəyini daha yaxşı başa düşmək üçün “Facebook”a xüsusi sorğular göndərmişik”, – o deyib.
V.Dombrovskis həmçnin qeyd edib ki, “Libra” kriptovalyutası layihəsi banklar və maliyyə qurumlarına transsərhəd tranzaksiyalarının dəyərini və vaxtını azaltmaq zərurəti barədə xatırlatmadır.
Qeyd edək ki, Avroqrupun Helsinkidə keçirilən qeyri-rəsmi görüşündən əvvəl Fransanın Maliyyə naziri Bruno Le Mer Aİ-nin öz dövlət rəqəmsal valyutasını yaratmağa və “Facebook”un kriptovalyutasından – “Libra”dan istifadənin qadağan olunmasını təklif edib.