“Apple” korporasiyası ABŞ Ədliyyə Departamenti ilə məşğulluq sahəsində ayrı-seçkilik iddiaları ilə bağlı təhqiqatı həll etmək üçün əldə edilmiş razılaşmanın bir hissəsi olaraq təxminən 25 milyon dollar ödəyəcək. Bundan əlavə, şirkət işçilərə ayrı-seçkiliyə qarşı qanunlar üzrə təlim keçirəcək.
İstintaq 2019-cu ildə, “Apple”ın vətəndaşlığa əsaslanan ayrı-seçkiliyi qadağan edən federal qanunu pozaraq müəyyən vəzifələrə işə qəbul zamanı ABŞ vətəndaşları və “green card” sahibləri əvəzinə, immiqrant işçilərə üstünlük verməkdə şübhəli bilinəndə başlayıb.
ABŞ Ədliyyə Departamentinin məlumatına görə, “Apple” öz saytında vakansiyaları elan etməyib. Üstəlik, elan edilmiş vakansiyalar üçün müraciət edənlərdən kağız müraciət tələb olunub, baxmayaraq ki, elektron müraciətlərə də icazə verilir.
“Reuters” yazır ki, xarici işçi qüvvəsi çox vaxt ABŞ işçilərini işə götürməkdən daha ucuz başa gəlir, eyni zamanda işəgötürənlərinin sponsorluğuna güvənən immiqrantların başqa işə getmə ehtimalı daha azdır.
