Aran arıçıları yay balının süzümünə başlayıblar.
Gəncə Arıçılıq Assosiasiyasının sədri Füzuli Verdiyev bildirib ki, bu il yeni növ koronavirus pandemiyası ilə əlaqədar ölkədə tətbiq olunan xüsusi karantin rejiminin iqtisadiyyatın bütün sahələrində, o cümlədən kənd təsərrüfatında müəyyən çətinliklər yaratmasına baxmayaraq, daha çox köçəri arıçılığa üstünlük verən aran – Gəncə arıçıları üçün məhsuldarlıq yüksək olub.
Füzuli Verdiyev qeyd edib ki, pandemiya ilə əlaqədar ölkədə tətbiq olunan xüsusi karantin dövrünün ilk günlərində arıçıların arıxanalara gediş-gəlişində, arı ailələrinin müxtəlif yerlərə daşınmasında, eləcə də arıçıların ehtiyacı olan və xarici ölkələrdən idxal olunan mum, şan və digər arıçılıq məhsullarının fermerər üçün əlçatanlığında müəyyən çətinliklər yaranmışdı.
Eyni zamanda, bu il yazın əvvəlində yağıntılı günlərin daha çox olması, yayda respublika ərazisində müşahidə olunan quraqlıq və arıçıların son məhsullarını yığdıqları dövrdə – yayın sonunda isə yenidən yağıntılı günlərin üstünlük təşkil etməsi kənd təsərrüfatının bir çox sahələrinə, o cümlədən də arıçılıqda məhsuldarlığa ziyan vurub. Havaların qeyri–sabit keçməsi bal süzümünün vaxtında həyata keçirilməsini, eləcə də arıların dərmanlanmasını, dezinfeksiya işlərini və qışa hazırlıq prosesini ləngidib.
Bütün bunlara baxmayaraq, aran arıçıları öz təsərrüfatlarını il ərzində Kür qırağına, dağətəyi və dağlıq ərazilərə köçürdükləri üçün 3 dəfə bal süzümü həyata keçirə biliblər və məhsuldarlıq da oturaq arı təsərrüfatlarından fərqli olaraq xeyli yüksək olub.
Assosiasiya sədri qeyd edib ki, hazırda Gəncə şəhəri üzrə subsidiya almaq üçün 89 arıçı qeydiyyatdan keçib. Arıçılar bol məhsul götürmək üçün arıxanalarında əsasən müxtəlif xəstəliklərə davamlı, yüksək məhsuldarlığa malik cins arılara üstünlük verməli, profilaktiki tədbirləri vaxtlı-vaxtında yerinə yetirməli, ənənələrə əsaslanan təcrübələri ilə yanaşı, elmi- nəzəri biliklərini artırmalı və daha çox innovativ yenilikləri dəstəkləməlidirlər.
Balın satışından danışan Füzuli Verdiyev bildirib ki, bu vaxtadək arıçılar məhsullarını həm yerli alıcılara, həm də xarici turistlərə daha çox respublika üzrə təşkil olunmuş bal-sərgi yarmarkasında satıblar. Lakin pandemiya ilə əlaqədar respublika ərazisində tətbiq olunan xüsusi karantin rejimi dövründə bir çox tədbirlərlə yanaşı, otellərin, kafe, restoran və şadlıq saraylarının fəaliyyətinin dayandırılması balın satışında da məhdudiyyət yaradıb. Digər tərəfdən isə pandemiya dövründə əhalinin immuniteti artıran məhsul kimi arı məhsullarına, eləcə də bala üstünlük verməsi bu məhsulun fərdi alıcılar tərəfindən pərakəndə alışını artırıb.
Artıq bal süzümünə başlayan arıçı Rüstəm Musayev isə təsərrüfatında əsasən nəsildən-nəslə ötürülən ənənələrə üstünlük verən arıçılardandır. Arıçı deyir ki, son dövrlərdə texnologiyanın inkişafı nəticəsində artan elektromaqnit dalğalarının təsirindən arılar geri qayıdarkən öz yuvalarını tapmaqda çətinlik çəkirlər. Qlobal iqlim dəyişikliyi, təbiətdəki anomal hadisələr, quraqlıq və yağıntılı günlər arıların daha çox nektar topladığı günlərə təsadüf etdiyindən həm bu, həm də digər amillər məhsuldarlığa özünün mənfi təsirini göstərir. Rüstəm Musayev hesab edir ki, arıçılar arıları süni nektarinlə deyil, təbii yolla bəsləməyə üstünlük verməlidirlər. Çünki arının toplamış olduğu bu cür balın ümumi çəkisi az – əlverişli şəraitdə 1-1,5 kiloqram olsa da, keyfiyyəti yüksək olur.
