Avropa Yenidənqurma və İnkişaf Bankı (AYİB) Dünya Bankının Qlobal Yol Təhlükəsizliyi Fondu vasitəsilə UK-Aid (Böyük Britaniya Yardımı) Azərbaycanda transformasiya layihəsini maliyyələşdirib.
Bu barədə AYİB-dən bildirilib. Məlumata görə, ötən ay Sumqayıt şəhər 2 nömrəli məktəbin qarşısındakı yol sahəsi uşaqların təhlükəsizliyini təmin edəcək şəkildə transformasiya edilib. Transformasiyanın məqsədi məktəb ətrafında nəqliyyatın sürətini azaltmaq və yollarda uşaqların təhlükəsizliyini artırmaq olub.
Oktyabrın 12-də AYİB-in Təhlükəsiz və Davamlı Nəqliyyat üçün Şərq Alyansı (EAAST), Azərbaycan Milli Avtomobil Klubu (AMAK) və Qlobal Şəhərsalma Təşəbbüsü (GDCI) ilə tərəfdaşlıq çərçivəsində əsas qərarverənlər, maraqlı tərəflər və Azərbaycan mediası üçün ərazinin transformasiyası ilə bağlı son aylarda görülən işləri təqdim etmək, bu transformasiyanın ilkin təsirini qiymətləndirmək, mənimsənilən dərsləri müzakirə etmək və Azərbaycanda gələcək tətbiq imkanlarını araşdırmaq üçün seminar təşkil edib.
Seminar təşkilatçıları qeyd ediblər ki, bir neçə həftə ərzində transformasiya məktəbin qarşısındakı sıxlığı və nəqliyyatın hərəkət sürətini xeyli azaldıb. Hazırda sürət həddini aşan avtomobillərin sayı 17%, məktəb qarşısında avtomobillərin maksimal sürəti isə 33% azalıb. Seminarda həmçinin uşaqlar üçün təhlükəsiz yol layihəsinin əsas konsepsiyaları nəzərdən keçirilib, nəzəri aspektlərə baxılıb, beynəlxalq nümunələr və 2 nömrəli məktəbdə tətbiq olunan layihə həllərinin ətraflı təhlili aparılıb. Maraqlı tərəflər nəticələri öz gözləri ilə görmək və tələbə və müəllimlərin rəylərini dinləmək üçün əraziyə baş çəkiblər.
“Məktəbətrafı yollarda uşaqların təhlükəsizliyinə üstünlük verməyi öyrənməliyik. Bu gün Qlobal Şəhərsalma Təşəbbüsünün əsas qlobal ekspertlərinin bu məqsədə nail olmaqda alətlər dəstini hazırlamaq üçün bizimlə işləməsindən və bu layihənin hazırlanmasına kömək etmək üçün AMAK və EASST-dən çox bacarıqlı yerli tərəfdaşların bizimlə olmasından çox məmnunuq”, AYİB-in Azərbaycandakı nümayəndəliyinin rəhbəri Kamola Mahmudova vurğulayıb.
GDCI həmçinin layihə çərçivəsində istifadə edilmiş və bir çox ölkələrdə beynəlxalq səviyyədə uğurla tətbiq edilmiş və bu işi təkrarlamaq istəyən qruplara təqdim ediləcək “Uşaqlar üçün küçələrin layihələndirilməsi” alətlər dəstini təqdim etdi. Alətlər dəsti Azərbaycanda maraqlı tərəflər, eləcə də donorlar, yol təhlükəsizliyinə nəzarət edən qurumlar və yol təhlükəsizliyini yaxşılaşdırmaq üçün çalışan digər müvafiq qurumlar üçün təqdim olunacaq.
Qeyd edək ki, layihə Təhlükəsiz və Davamlı Nəqliyyat üçün Şərq Alyansı (EASST), AYİB, Qlobal Şəhərsalma Təşəbbüsü (GDCI) və Azərbaycan Milli Avtomobil Klubu (AMAK) tərəfindən həyata keçirilib.
Xatırladaq ki, AYİB Azərbaycanda aparıcı institusional investordur. 1992-ci ildə öz fəaliyyətinə başladığı tarixdən etibarən bank 181 layihəyə 3,65 milyard avrodan çox sərmayə qoyub.
