Rumıniyadan, Amerika Birləşmiş Ştatlarından və Filippin Respublikasından gələn, yaxud tranzitlə keçən nəqliyyat vasitələri ilə bağlı müvafiq tədbirlərin görülməsi üçün Azərbaycan Respublikasının Dövlət Gömrük Komitəsinə müraciət olunub.
Banker.az Azərbaycan Qida Təhlükəsizliyi Agentliyinə (AQTA) istinadən xəbər verir. AQTA-dan bildirilir ki, məqsəd respublika ərazisinin başqa ölkələrdən keçə biləcək yoluxucu heyvan xəstəliklərindən qorunmasıdır. Belə ki, Ümumdünya Heyvan Sağlamlığı Təşkilatının (OIE) məlumatına əsasən, Rumıniyanın Kluj və Kovasna inzibati ərazi vahidlərində süngərvari ensefalopatiya, Amerika Birləşmiş Ştatlarının Texas, Şimali Karolina, Şimali Dakota, Minnesota, Men, Nebraska və Nyu-York ştatlarında, Filippin Respublikasının Benqet və Şimali Kotabato əyalətlərində isə yüksək patogen quş qripi xəstəliyi qeydə alınıb.
Bu səbəbdən də, Rumıniyanın Kluj və Kovasna inzibati ərazi vahidlərindən bütün növ diri iribuynuzlu kənd təsərrüfatı heyvanları və onlara aid məhsulların, o cümlədən genetik materialların, tərkibinə heyvan mənşəli zülal və sümük unu əlavə olunan yemlərin, Amerika Birləşmiş Ştatlarının Texas, Şimali Karolina, Şimali Dakota, Minnesota, Men, Nebraska və Nyu-York ştatlarından, Filippin Respublikasının Benqet və Şimali Kotabato əyalətlərindən OIE-nin “Quruda yaşayan heyvanların sağlamlıq Məcəlləsi”nə əsasən, zonalaşma prinsipi nəzərə alınmaqla, diri quş və inkubasiya yumurtalarının, quş ətinin, tərkibində quş emalı məhsulları olan quş ətindən və bütün növ quşçuluq məhsulundan alınan hazır ət məhsullarının (quş qripi viruslarının məhv edilməsini təmin edən termik emala məruz qalan mallar istisna olmaqla), quş yemləri və quş üçün yem əlavələrinin (bitki mənşəli, kimyəvi və mikrobioloji sintez yolu ilə alınmış yemlər və yem əlavələri istisna olmaqla), quşların saxlanması, kəsilməsi və emalı üçün istifadə olunmuş avadanlıqların idxalına, habelə qeyd olunan ölkələrin həmin inzibati ərazi vahidlərindən diri quşların Azərbaycan ərazisindən tranzitinə müvəqqəti məhdudiyyət tətbiq olunub.
