Azərbaycanın “AzVirt” şirkəti Serbiyada Ruma-Sabaç-Loznisa avtomobil yolunun tikintisini həyata keçirəcək.
Şirkətdən bildirilib ki, bununla əlaqədar keçirilən imzalanma mərasimində Serbiyanın Prezidenti Aleksandr Vuçiç də iştirak edib. Müqaviləni Serbiya hökuməti adından Nəqliyyat və İnfrastruktur naziri Zorana Mixailoviç və Azərbaycanın “Azvirt” Məhdud Məsuliyyətli Cəmiyyətinin baş direktoru Kamil Əliyev imzalayıblar.
Serbiyada görüləcək işlər barədə fikirlərini bölüşən “Azvirt” MMC-nin baş direktoru K.Əliyev Serbiyanın Prezidenti A.Vuçiçə Azərbaycan şirkətinə böyük etimad göstərdiyinə görə minnətdarlığını bildirib: “Biz 2012-ci ildən Serbiyada çalışırıq. İcra etdiyimiz layihələrdə üzərimizə götürdüyümüz öhdəlikləri gördüyümüz işin keyfiyyəti ilə təsdiqləməyə çalışmışıq. Əsas işçi gücümüzü öz əməksevərliyi və məsuliyyəti ilə seçilən yerli serb vətəndaşları təşkil edib. Serbiya dövləti son vaxtlar yol infrastrukturu layihələrinə böyük önəm verir və bizim üçün də şərəfdir ki, bu ideyaların reallaşdırlmasında iştirak edirik”.
Mərasimdə çıxış edən A.Vuçiç bu layihənin həyata keçirilməsi üçün şirkət baxımından uğurlu seçim etdiklərini deyib: “Onlar bu işin öhdəsindən layiqincə gələcəklər. Çünki nəyə qadir olduqlarını Liq-Prelina magistralının tikintisində bir neçə il əvvəl nümayiş etdiriblər. Sizin Serbiyada etdiklərinizdən məmnun qalmışıq və inanırıq ki, gələcəkdə də belə olacaq. Əminik ki, hər şey vaxtında və yüksək keyfiyyətlə icra olunacaq”.
“Azvirt” MMC-nin baş direktoru K.Əliyev bildirib ki, Prezident İlham Əliyevin uğurlu siyasəti nəticəsində yerli şirkətlərin ölkə hüdudlarından kənarda nüfuzu artıb və böyük inam qazanıblar. Artıq “Azvirt” MMC nəinki Serbiya, həmçinin Bosniya və Herseqovina, Ukrayna, Qırğızıstan və digər ölkələrdə keçirilən tenderlərdə qalib olmaqla bu etibarı qazandığımızı bir daha təsdiqləyib. Dövlətimizin başçısının siyasətinin nəticəsidir ki, “Azvirt” MMC digər şirkətlər kimi ölkəmizdə öz inkişaf yolunu rahatlıqla keçib və böyük yol layihələrinin icrasına cəlb olunmaqla göstərilən etimadı doğrulda bilib. Bu artıq xaricdə başqa ölkələrin eyni istiqamətli şirkətləri ilə rəqabətdə qalibiyyətimizlə daha çox özünü büruzə verir.
Qeyd edək ki, dəyəri 467,5 milyon avro qiymətləndirilən yolun ümumi uzunluğu 77 kilometr olacaq. Layihənin Sabaç-Loznisa hissəsi yüksəksürətli yol kimi tikiləcək. Layihədə həm də Sava çayı üzərindən körpünün salınması da nəzərdə tutulub. Tikintinin 2023-cü ildə tamamlanması planlaşdırılır. Layihənin həyata keçirilməsi üçün Serbiya büdcəsindən ayrılan vəsaitdən əlavə, digər maliyyə mənbələrindən də istifadə olunacaq. Azərtac
Azərbaycan şirkəti Serbiyada avtomobil yolu tikəcək – Müqavilə imzalanıb
