2026-cı ilin yanvar-iyun aylarında Azərbaycanda nəqliyyat dəhlizlərində dəmir yolu nəqliyyatı ilə 7 587,6 min ton, avtomobil nəqliyyatı ilə 5 699,0 min ton, dəniz nəqliyyatı ilə isə 3 365,2 min ton yük daşınıb.
Banker.az Dövlət Statistika Komitəsinin məlumatına istinadən xəbər verir ki, ötən ilin eyni dövrü ilə müqayisədə dəmir yolu ilə daşınan yüklərin həcmi 467,5 min ton və ya 6,6%, avtomobil nəqliyyatı ilə daşınan yüklərin həcmi isə 391,3 min ton və ya 7,4% artıb.
Əksinə, dəniz nəqliyyatı ilə yükdaşımaların həcmi 387 min ton və ya 10,3% azalıb.
2026-cı ilin ilk yarısında dəmir yolu ilə daşınmış yüklərin 46,6%-ni, avtomobil nəqliyyatı ilə daşınmış yüklərin isə 46,5%-ni tranzit yüklər təşkil edib. 2025-ci ilin eyni dövründə bu göstəricilər müvafiq olaraq 45,8% və 42,3% olub.
Beləliklə, illik müqayisədə dəmir yolu ilə daşınan yüklərdə tranzitin payı 0,8 faiz bəndi, avtomobil nəqliyyatında isə 4,2 faiz bəndi yüksəlib.
2026-cı ilin yanvar-iyun aylarında Şərq-Qərb nəqliyyat dəhlizi ilə 9 207,4 min ton yük daşınıb. Bu, illik müqayisədə 906,6 min ton və ya 10,9% çoxdur. Dəhliz üzrə yükdaşımaların 4 595,0 min tonu Avropa-Qafqaz-Asiya nəqliyyat dəhlizinin payına düşüb ki, bu da əvvəlki ilin eyni dövrü ilə müqayisədə 506,1 min ton və ya 12,4% artım deməkdir.
Şimal-Cənub nəqliyyat dəhlizi ilə daşınan yüklərin həcmi isə 131,2 min ton və ya 2,8% azalaraq 4 559,3 min tona düşüb. Şimal-Qərb dəhlizində yükdaşımalar 307,1 min ton və ya 10,5% azalaraq 2 623,3 min ton, Cənub-Qərb dəhlizində isə 3,6 min ton və ya 1,4% artaraq 261,8 min ton təşkil edib.
Dəhlizlər üzrə ümumi yükdaşımaların həcmi 2026-cı ilin ilk yarısında 15 056,8 min ton olub. Bu göstərici 2025-ci ilin eyni dövründə 14 869,9 min ton təşkil edib və beləliklə, 186,9 min ton və ya 1,3% artıb.
