Beynəlxalq Valyuta Fondu (IMF) Azərbaycandakı ofisinin bağlanması ilə əlaqədar missiya səfərlərinin təşkilati məsələlərinə dair təkliflərini təqdim edib.
Bu barədə Maliyyə Nazirliyinin məlumatında bildirilir.
Məlumata görə, nazir Samir Şərifov Bakıda səfərdə olan IMF-in Azərbaycan, Yaxın Şərq və Mərkəzi Asiya Departamenti üzrə yeni təyin olunan missiya rəhbəri xanım Anna Bordonun başçılıq etdiyi nümayəndə heyətini qəbul edib.
Görüşdə bu ilin oktyabr ayında Mərakeşdə keçiriləcək BVF-nin və Dünya Bankının illik toplantılarından sonra baş tutacaq Fondun Azərbaycan üzrə IV Maddə məsləhətləşmələrinə dair hazırlıq işləri, o cümlədən bununla əlaqədar BVF tərəfindən aparılacaq analitik təhlillər üzrə mümkün istiqamətlər diqqət mərkəzində olub, 2022-ci ilin makroiqtisadi yekunları, dövlət və icmal büdcələrin icra vəziyyəti, habelə 2023-cü il və ortamüddətli dövr üçün gözləntilər, büdcə siyasətinin istiqamətləri, büdcə qaydasının tətbiqi ilə bağlı məsələlər, sosial-iqtisadi sahədə yeni təşəbbüslər, ölkə iqtisadiyyatının inkişaf perspektivləri, o cümlədən qeyri-neft sektorunun ölkə iqtisadiyyatında payının artması, büdcə-vergi siyasəti sahəsində aparılan islahatlar üzrə geniş fikir mübadiləsi aparılıb.
S.Şərifov A.Bordona işğaldan azad olunmuş Qarabağ və Şərqi Zəngəzura qayıdacaq vətəndaşlarımızın dayanıqlı məskunlaşması üçün aparılan sürətli bərpa və yenidənqurma işləri barədə məlumat verib, böyük maliyyə resursları tələb edən Böyük Qayıdış proqramının ölkənin daxili maliyyə resursları hesabına həyata keçirildiyini vurğulayıb.
Görüşdə missiya rəhbəri Fond tərəfindən ölkəmizin əsas iqtisadi qurumlarının texniki dəstəyə olan ehtiyaclarının Fondun yeni fəaliyyətə başlamış Qafqaz, Mərkəzi Asiya və Monqolustan üzrə Regional Potensialın İnkişafı Mərkəzi və yaxud birbaşa IMF-in mərkəzi ofisi tərəfindən qarşılanmasına hər zaman hazır olduqlarını vurğulayıb, habelə Fondun Azərbaycanda ofisinin bağlanması ilə əlaqədar missiya səfərlərinin təşkilati məsələlərinə dair təkliflərini təqdim edib.
