Apple öz cihazlarının lizinq proqramını istifadəyə verməyə hazırlaşır. Bu barədə mənbələrə istinadən Bloomberg məlumat yayıb.
Məlumata görə, Apple Upgrade proqramının iyulun 28-də istifadəyə verilməsi planlaşdırılır. Proqram iPhone, Mac, iPad və Apple Watch modellərinin əksəriyyətini əhatə edəcək. Layihənin maliyyə tərəfdaşı Klarna Group olacaq. Bu xəbərin fonunda şirkətin səhmləri 11% bahalaşaraq 20,78 dollara yüksəlib.
Xidmət ABŞ-də həm pərakəndə mağazalarda, həm də onlayn şəkildə əlçatan olacaq. Apple Upgrade abunə prinsipi ilə işləyəcək. İstifadəçilər müqavilə müddəti başa çatmadan cihazın dəyərini tam ödəyə, onu yeni modellə əvəz edə və ya lizinq müddətinin sonunda cihazı özlərində saxlaya biləcəklər. Bəzi hallarda əlavə ödəniş tələb olunacaq. Müştərilər cihazı lizinq müddəti bitdikdən sonra geri qaytara biləcəklər.
Bloomberg yazır ki, Apple proqramı məhsullarının bahalaşması fonunda istifadəyə verir. Şirkət Apple Upgrade xidmətini aylıq ödənişləri azaltmağa imkan verən seçim kimi təqdim etməyi planlaşdırır.
Hazırkı proqramdan fərqli olaraq, Apple Upgrade xidmətinə AppleCare daxil edilməyəcək. Apple Watch SE, baza səviyyəli iPad, iPhone 16 və MacBook Neo modelləri proqramda iştirak etməyəcək. Korporativ və təhsil məqsədli alışlar da istisna olunacaq.
Apple daha əvvəl öz abunə proqramını yaratmağı nəzərdən keçirsə də, 2024-cü ildə bu plandan imtina etmişdi. Bloomberg qeyd edir ki, Klarna ilə əməkdaşlıq şirkətə maliyyə riskini üzərinə götürmədən yeni alış modeli təklif etməyə imkan verir.
İyulun ortalarında Apple bazar kapitallaşmasına görə Nvidia-nı geridə qoyaraq dünyanın ən dəyərli açıq səhmdar cəmiyyətinə çevrilmişdi. TradingView məlumatına görə, şirkətin bazar dəyəri 4,88 trilyon dollara çatmışdı.
Bloomberg hesablamalarına əsasən, Apple səhmləri iyun ayındakı minimum səviyyədən 21%, ilin əvvəlindən isə 23% bahalaşıb. Agentliyin qeyd etdiyi kimi, bu göstərici şirkəti “möhtəşəm yeddilik” (Magnificent Seven) arasında ən yüksək gəlirliliyə malik edib. Son bahalaşma investorların texnologiya sektorunun digər seqmentlərindən vəsaitlərini Apple səhmlərinə yönəltməsi ilə izah olunur.
Bundan əvvəl Nikkei qəzeti yazmışdı ki, Apple 2026-cı ildə beş yeni iPhone modelini təqdim etməyi planlaşdırır. Nəşrin məlumatına görə, yeni modellərin təqdimatı 2026-cı ilin ikinci yarısı və 2027-ci ilin birinci yarısında baş tutacaq. Şirkət eyni zamanda qatlana bilən cihazların payını və çeşidini artırmağı hədəfləyir.
