Keçən ilin oktyabrında İsrailin Qəzza zolağında hərbi əməliyyatlara başlamasından bəri burada işsizlik təxminən 80%-ə çatıb.
Bu barədə BMT Əmək Agentliyi müharibənin məşğulluğa təsirinə dair dördüncü qiymətləndirmə hesabatında bildirib.
Hesabata görə, Qəzza zolağında işsizlik 79,1%-ə, İordan çayının qərb sahilində isə təxminən 32%-ə çatıb. Fələstin ərazilərində orta işsizlik nisbətinin 50,8% olduğu qeyd olunub.
BƏT-in Ərəb Dövlətləri üzrə Regional Direktoru Ruba Jaradat deyib ki, bu hesabat iş tapmaqdan vaz keçən fələstinliləri istisna edir. “Əslində vəziyyət daha pisdir”, o deyib.
“Təsəvvür edin ki, bu çox yüksək işsizlik səviyyəsi ilə insanlar özləri və ailələri üçün ərzaq təmin edə bilməyəcəklər. Bu, onların sağlamlığına da təsir edir…. Pulları olsa belə, oradakı fəlakətin nəticələrini qarşılayacaq xəstəxanalar yoxdur”, – Jaradat qeyd edib.
BƏT hesabatında bildirib ki, real ümumi daxili məhsul (ÜDM) Fələstin ərazilərində müharibə başlayandan bəri təxminən 33%, Qəzza zolağında 83,5% və qərb sahilində 22,7% azalıb.
“İşğal edilmiş Fələstin ərazilərində və xüsusilə İordan çayının qərb sahilində gəlirlərin azalması bir çox ailəni ağır yoxsulluğa sürükləyib”, – Jaradat deyib.
Xatırladaq ki, İsrailin Qəzzada quru və hava əməliyyatı HAMAS-ın oktyabrın 7-də İsrailin cənubuna hücumu nəticəsində 1200-ə yaxın insanın ölümünə və daha 253 nəfərin girov götürülməsinə cavab olaraq həyata keçirilib. Qəzza zolağında səhiyyə orqanlarının məlumatına görə, İsrailin hücumu 36500-dən çox insanın ölümünə səbəb olub, burada 2,3 milyon əhalisinin yarısı hələ müharibədən əvvəl yoxsulluq həddində yaşayırdı.
