BMT-nin proqnozlarına görə, qlobal süni intellekt (AI) bazarı yaxın illərdə 4,8 trilyon dollara çatacaq, süni intellekt texnologiyalarının özü isə iş yerlərinin 40%-nə təsir edəcək. BMT-nin fikrincə, süni intellektin yayılması əmək məhsuldarlığını artıracaq, lakin inkişaf etmiş və inkişaf etməkdə olan ölkələr arasında bərabərsizliyi əhəmiyyətli dərəcədə artıracaq.
Xüsusilə, əsasən aşağı gəlirli 118 ölkə süni intellektlə bağlı beynəlxalq müzakirələrdə iştirak etmir və bu istiqamətdə öz strategiyalarını inkişaf etdirmir. UNCTAD tövsiyə edir ki, bu ölkələr süni intellektlə bağlı qaydaların hazırlanmasında daha fəal iştirak etsinlər.
Növbəti on il ərzində süni intellekt texnologiyaları bazarı təxminən 25 dəfə artacaq, 2023-cü ildəki 189 milyard dollardan 2033-cü ildə təxminən 4,8 trilyon dollara çatacaq. Mütəxəssislər hesab edirlər ki, 2033-cü ilə qədər süni intellekt dünya üzrə iş yerlərinin təxminən 40%-nə təsir edəcək.
Bu, qeyri-bərabərlik və işsizlik baxımından AI-nin mənfi təsirlərinə diqqət çəkən böyük beynəlxalq təşkilatın ilk hesabatı deyil. Belə ki, yanvar ayında Dünya İqtisadi Forumu işəgötürənlərin 41%-nin süni intellektin onları əvəz edə biləcəyi sahələrdə kadrların sayını azaltmağı planlaşdırdığını göstərən məlumatları təqdim edib.
Keçən il Beynəlxalq Valyuta Fondunun (BVF) direktoru Kristalina Georgieva demişdi ki, süni intellekt müxtəlif ölkələrdə iş yerlərinin 26%-60%-nə təsir edəcək.
