İngiltərə Bankı (BoE)cümə axşamı iqtisadi artım perspektivlərinin pisləşməsi fonunda faiz dərəcələrini endirib və bununla da ABŞ Federal Ehtiyat Sistemidən fərqli bir yol seçib.
Banker.az xəbər verir ki, BoE uçot faiz dərəcəsini 4.75%-dən 4.5%-ə endirib ki, bu da gözlənilən idi. Lakin gözlənilmədən iki siyasətçi yarım faiz bəndi həcmində daha böyük azalmaya səs verib. Bu qərar funt sterlinqin ABŞ dolları qarşısında dəyər itirməsinə səbəb olub və məzənnə 0.9% ucuzlaşaraq 1.239$-a düşüb.
“Komitənin [pul siyasəti] orta müddətli inflyasiya perspektivi ilə bağlı inkişaf edən baxışlarına əsasən, monetar siyasətin məhdudlaşdırıcı təsirinin daha da aradan qaldırılmasına tədricən və ehtiyatla yanaşmaq məqsədəuyğundur”, – mərəzi bankın bəyanatında bildirilib.
Daha böyük faiz endirimini dəstəkləyən siyasətçilərdən biri əvvəllər sərt pul siyasətini müdafiə edənlərdən olan Ketrin Mann olub. O, əvvəllər daha yüksək faiz dərəcələrinin saxlanmasının tərəfdarı kimi tanınırdı. Digər fərqli mövqe bildirən üzv isə Svati Dinqra olub, o, daha aşağı faiz dərəcələrini müdafiə etməsi ilə tanınır.
İngiltərə Bankının bu qərarı, keçən həftə Frankfurtda Avropa Mərkəzi Bankının (ECB) əsas faiz dərəcəsini 0.25 faiz bəndi azaltmasından sonra gəlib. FED isə inflyasiyanın hələ tam nəzarət altına alınmadığını və ticarət müharibələri ilə bağlı qeyri-müəyyənlikləri nəzərə alaraq keçən ay faiz dərəcələrini dəyişməz saxlayıb.
ABŞ və Avropanın pul siyasətləri fərqli istiqamətə gedir
Bu il ABŞ və Avropada monetar siyasətin fərqli istiqamət götürməsi gözlənilir. ABŞ-da iqtisadi genişlənmə və tələbatın yaratdığı qiymət artımları müşahidə edildiyi halda, Böyük Britaniya stagnasiya (iqtisadi durğunluq) və inflyasiya ilə mübarizə aparır. İnflyasiyanın əsas səbəbləri isə enerji qiymətləri və zəif valyutadır. Bu da o deməkdir ki, İngiltərə Bankı ehtimal ki, kredit faizlərini ardıcıl olaraq azaldacaq, FED isə hələ gözləmə mövqeyində qalacaq.
Avropada mərkəzi banklar faiz dərəcələrini azaldarkən FED-in dəyişməz saxlaması dolların güclənməsinə səbəb olur. ABŞ dolları, Prezident Donald Trampın noyabrda yenidən seçilməsindən sonra əhəmiyyətli dərəcədə bahalaşıb. Hazırda 1 funt sterlinq 1.24 dollar edir, halbuki oktyabrın sonunda bu məzənnə 1.34$ idi.
Böyük Britaniyada inflyasiya dekabr ayında 2.5% olub və İngiltərə Bankı qısamüddətli dövrdə bu göstəricinin 3.7%-ə qədər yüksələcəyini gözləyir. Bunun əsas səbəbi enerji qiymətləridir. Bu göstərici 2%-lik hədəfdən yüksəkdir və keçən ilin ikinci yarısında müşahidə edilən göstəricilərdən daha yuxarıdır. Lakin siyasətçilər bunun uzunmüddətli təsir göstərəcəyini gözləmirlər və inflyasiyanın orta müddətli perspektivdə hədəf səviyyəsinə qayıdacağını bildirirlər.
Eyni zamanda, gələn həftə açıqlanacaq rəsmi məlumatların dördüncü rübdə ÜDM-in demək olar ki, dəyişməz qaldığını göstərəcəyi gözlənilir. İngiltərə Bankı iqtisadi artımın gözləniləndən daha zəif olduğunu qəbul etsə də, ilin ortalarından etibarən artım tempinin yüksələcəyini proqnozlaşdırır.
