Neft qiymətləri əvvəlki sessiyada təxminən 4%-lik sıçrayışdan sonra cümə axşamı yenidən ucuzlaşır. İranın ABŞ-la müharibənin dayandırılması üçün diplomatiyaya açıq olduğunu bildirməsi bazarda Yaxın Şərqdən tədarük risklərinin azala biləcəyi gözləntilərini gücləndirib.
Banker.az xəbər verir ki, Brent markalı neftin fyuçersləri 0,9% azalaraq 102,13 dollar/barelə, ABŞ-nin WTI markalı nefti isə 0,7% ucuzlaşaraq 91,56 dollar/barelə düşüb.
Qiymətlər bir gün əvvəl əks istiqamətdə kəskin hərəkət etmişdi. Çərşənbə günü Brent 3,86% bahalaşaraq 103,08 dollar/bareldə, WTI isə 1,81% artımla 92,16 dollar/bareldə sessiyanı başa vurub. İran Prezidenti Məsud Pezeşkianın BMT Baş Assambleyasındakı sərt çıxışı və ABŞ–İran danışıqlarının nəticəsiz qala biləcəyi qorxusu bazarda geosiyasi risk mükafatını yenidən artırmışdı.
Lakin “Reuters”ə danışan yüksək vəzifəli İran rəsmisi Tehran və Vaşinqton arasında müharibənin necə dayandırılacağı ilə bağlı ciddi fikir ayrılıqlarının qaldığını, bununla belə diplomatiyanın davam etməli olduğunu bildirib. Bu açıqlama cümə axşamı qiymətlər üzərində aşağı istiqamətli təzyiq yaradıb.
Digər tərəfdən, bazarda təkliflə bağlı vəziyyət əvvəlki həftələrlə müqayisədə yaxşılaşıb. Səudiyyə Ərəbistanı Hörmüz boğazından yan keçərək nefti Qırmızı dəniz sahilinə daşımağa imkan verən “Şərq–Qərb” boru kəmərinin fəaliyyətini bərpa edib. Bu marşrutun gücü gündə 7 milyon barelə qədərdir və onun yenidən işə düşməsi Səudiyyə neftinin dünya bazarına çıxışı ilə bağlı riskləri azaldır.
“Fitch Ratings” də boru kəməri üzrə nəql bərpa olunduqdan sonra neft qiymətlərində geriləmə gözləyir. Agentlik Brent üçün 2026-cı il üzrə orta qiymət proqnozunu 87 dollar/barel səviyyəsində saxlayıb. Bununla belə, 2027-ci il proqnozu 65 dollardan 70 dollar/barelə qaldırılıb.
ABŞ-dakı ehtiyatlar da qiymətlər üçün əlavə təzyiq yaradır. ABŞ Energetika Nazirliyinin məlumatına görə, ötən həftə ölkənin kommersiya xam neft ehtiyatları gözləntilərin əksinə olaraq təxminən 3 milyon barel artıb. Benzin ehtiyatları isə 1,69 milyon barel, distillat ehtiyatları 428 min barel azalıb.
Son günlərin hərəkəti neft bazarında yüksək volatilliyin davam etdiyini göstərir. Brent sentyabrın ortalarında Yaxın Şərqdə tədarük risklərinin artması ilə 109,97 dollar/barelə qədər yüksəlmiş, sentyabrın 23-də isə 97,36 dollaradək geriləmişdi. Beləliklə, bir həftədən bir qədər artıq müddətdə qiymətin diapazonu 12 dollardan çox olub.
