Beynəlxalq Valyuta Fondu (BVF) 2026–2031-ci illər dövründə Azərbaycanın monetar göstəricilərində əhəmiyyətli struktur dəyişiklikləri gözləyir.
Bu barədə fondun məlumatında bildirilib.
BVF-nin 2023–2031-ci illər üzrə son proqnozlarına əsasən, Azərbaycanın xalis xarici aktivləri 2025-ci ildəki 25,8 milyard manatdan 2027-ci ildə 32,8 milyard manata qədər artacaq, bundan sonra isə 2031-ci ilədək 24,7 milyard manata qədər azalacaq. Müqayisə üçün qeyd edək ki, bu göstərici 2023-cü ildə 25,2 milyard manat, 2024-cü ildə isə 26,6 milyard manat təşkil edib.
BVF proqnozlaşdırır ki, Azərbaycan Mərkəzi Bankının xalis beynəlxalq ehtiyatları 2025-ci ildəki 21,8 milyard manatdan 2027-ci ildə 27,9 milyard manata qədər yüksələcək, lakin daha sonra tədricən azalaraq 2031-ci ildə 18,7 milyard manata düşəcək. Eyni zamanda, fondun qiymətləndirməsinə görə, kommersiya banklarının xalis xarici aktivləri proqnoz dövrü boyunca artmaqda davam edəcək – 2025-ci ildəki 5,2 milyard manatdan 2031-ci ildə 7,2 milyard manata qədər.
Bununla yanaşı, BVF orta müddətli perspektivdə xalis daxili aktivlərin əhəmiyyətli dərəcədə artacağını gözləyir. Bu göstərici 2025-ci ildəki 24 milyard manatdan 2031-ci ildə 51,1 milyard manata qədər yüksələcək və altı il ərzində iki dəfədən çox artacaq. 2023 və 2024-cü illərdə bu göstərici müvafiq olaraq 19,9 milyard və 20 milyard manat təşkil edib.
Daxili kreditləşmənin də artacağı proqnozlaşdırılır: 2025-ci ildəki 29,7 milyard manatdan 2031-ci ildə 54,1 milyard manata qədər. Ümumilikdə iqtisadiyyatın kreditləşdirilməsi isə eyni dövrdə 29,6 milyard manatdan təxminən 49,6 milyard manata qədər yüksələcək.
