Çexiyanın “Mero” neft şirkəti və İtaliyanın TAL konserni trans-Alp neft kəmərinin genişləndirilməsinə dair saziş imzalayıblar. 2025-ci ildən bu neft kəməri Rusiyanın “Drujba” kəmərinin əvəzinə istifadə ediləcək.
Bu barədə Çexiyanın Baş naziri Petr Fiala tviter səhifəsində məlumat verib.
“TAL neft kəmərinin ötürmə qabiliyyətinin artırılması 2025-ci ildən etibarlı təchizatçılardan Çexiyaya neft tədarükünün həcmini ildə 4 milyon ton artırmağa imkan verəcək ki, bu da bizim tələbatımızı tam ödəyəcək”, – P.Fiala bildirib. Onun sözlərinə görə, bunun köməyi ilə Çexiya Rusiya neftindən asılılıqdan xilas olacaq.
Çexiya İnformasiya Agentliyinin məlumatına görə, bu kəmərlə tədarüklərin həcmi ildə 8 milyon ton təşkil edəcək. Anlaşma Çexiyaya 1,6 milyard krona (təxminən 124,3 milyon manata) başa gəlib. Xərcləri Çexiyanın “Mero” şirkəti qarşılayacaq.
