Amerikalı investor Cim Rocers deyir ki, yuan qlobal ehtiyat valyutası kimi hələ dolları əvəz edə bilməz. O, bunu mayın 18-19-da Moskvada keçirilən “RBC Investments Invest Weekend” zamanı deyib.
“Mənim bir az yuanım var. Amma dünya valyutası konvertasiya oluna bilməz. Yuan konvertasiya olunmur”, – Rocers bildirib. Onun sözlərinə görə, Çin rəsmiləri bunun üzərində işləyir, lakin indi yuan hələ də sərbəst konvertasiya edilə bilməyən valyutadır.
“Ona görə də dollara rəqib tapmaq mənim üçün çox çətindir. Bizə etibarlı, beynəlxalq və konvertasiya edilə bilən bir şey lazımdır”, – Rocers bildirib. O, etiraf edib ki, özü də bütün zəruri qlobal tələblərə cavab verəcək valyuta axtarışını davam etdirir.
Eyni zamanda, Cim Rocers hələ də dolları saxlayır, çünki bir çox insanlar onu “təhlükəsiz sığınacaq” kimi qəbul etməyə davam edir, baxmayaraq ki, bu artıq belə deyil.
Cim Rocers əvvəllər dəfələrlə ABŞ-nin borc yükünün artırılmasının dollar üçün təhlükə yaratdığı barədə xəbərdarlıq edib. 2024-cü ilin yanvarında ABŞ-nin dövlət borcu tarixdə ilk dəfə olaraq 34 trilyon dolları ötüb, baxmayaraq ki, keçən ilin əvvəlində 31 trilyon dollardan az olub.
“Amerika dünya tarixinin ən böyük borcu olan ölkədir. Heç bir ölkənin belə böyük borcu yoxdur. Amerika özünü bəlaya düçar edir”, – Rocers qeyd edib.
ABŞ-nin borcu çox böyük olduğundan və artmaqda davam etdiyindən, Rocersin sözlərinə görə, bir çox insanlar dolların gələcəyindən narahatdırlar və ona mümkün alternativ axtarırlar. Bir çox ölkələr aktiv olaraq dollarla rəqabət apara biləcək alternativ axtarır – Çin, İran, Rusiya, Hindistan, Braziliya.
Cim Rocers əmindir ki, gec və ya tez dollar dominant valyuta olmaqdan çıxacaq. O hesab edir ki, bəzi ölkələrin dollarla ödənişləri başqa valyutalarla əvəz etmək istəyi ilə yanaşı, bu, Amerika iqtisadiyyatındakı problemlərlə bağlıdır.
