Çin ABŞ prezidenti Donald Trampın gömrük rüsumları tətbiq etməsindən sonra ilk dəfə rəsmi olaraq valyuta məzənnəsini müəyyən edərək yuanın dollar qarşısında məzənnəsini dəyişməz saxladı.
Banker.az xəbər verir ki, çərşənbə günü Çin Xalq Bankı (PBOC) yuanın məzənnəsini 1 dollar üçün 7.169 yuan səviyyəsində müəyyənləşdirib. Bu da Ay Yeni ili tətilindən əvvəlki səviyyəyə yaxındır. Eyni zamanda, Çin fond bazarlarında eniş qeydə alındı.
Bazar bağlanarkən Tramp Çin ixracına əlavə 10 faizlik gömrük rüsumları tətbiq etdiyini elan etdi. Buna cavab olaraq Pekin ABŞ-dan enerji resurslarının və digər malların idxalına rüsumlar tətbiq etdi ki, bu da gələn həftədən qüvvəyə minəcək.
Tramp administrasiyasının yüksək vəzifəli rəsmiləri uzun müddətdir ki, Çini valyutasını zəiflətməkdə ittiham edirlər. Bununla da ölkənin ixracının rəqabət qabiliyyətini artırdığını bildirirlər. Trampın birinci prezidentliyi dövründə ticarət müharibəsi zamanı Pekin yuanın dəyərini aşağı salmağa imkan vermişdi ki, bu da ABŞ-ın ixracına tətbiq etdiyi gömrük rüsumlarının təsirini yumşaltmışdı.
Çin yuanın sabitliyini nümayiş etdirdi, baxmayaraq ki, treyderlər onun ucuzlaşacağına dair proqnozlar verir.
Qlobal banklar gözləyirdilər ki, Çin Xalq Bankı Trampın tariflərinə və dolların güclənməsinə cavab olaraq yuanı zəiflədəcək. Kontinental yuanın məzənnəsi 1 dollar üçün 7,28 RMB səviyyəsində ticarət olunur ki, bu da Çin Mərkəzi Bankının valyutanın hərəkət etməsinə icazə verdiyi 2 faizlik diapazonun yuxarı həddinə yaxındır. Yuan, Trampın noyabr seçkilərində qalib gəlməsindən bəri təxminən 3 faiz dəyər itirib.
Çərşənbə günü məzənnənin sabit saxlanılması Pekinin dollar digər ticarət valyutalarına qarşı güclənsə belə, yuanın dəyərini qorumağa hazır olduğunun siqnalı kimi qəbul edilə bilər. Pekin öz iqtisadiyyatını stimullaşdırmağa və Tramp administrasiyasının gələcək addımlarını müəyyənləşdirməyə çalışır.
“Bu, bazara yuanın hələlik sabit saxlanılacağına dair bir siqnaldır”, – deyə BNP Paribas bankının Çin üzrə valyuta və faiz strategiyası bölməsinin rəhbəri Çzuy Van Financial Times-a bildirib.
O əlavə edib ki, Çin aktivlərinə dair bazar əhval-ruhiyyəsi, süni intellekt sahəsində fəaliyyət göstərən Çin şirkəti DeepSeek-in Silikon Vadisini böyük dil modelləri sahəsində əldə etdiyi uğurlarla heyrətləndirməsindən sonra yaxşılaşıb.
“İnsanlar yuanın ucuzlaşmasına dair daha ehtiyatlı davranacaqlar… Fond bazarında əhval dəyişib və bu, əsasən DeepSeek şirkətinin nailiyyətləri ilə əlaqədardır”, – Van əlavə edib.
Materik Çin bazarları DeepSeek hadisəsindən sonra ilk ticarət sessiyasına müsbət notlarla başlasa da, daha sonra eniş baş verdi.
Çinin materik hissəsində qeydiyyatdan keçmiş şirkətlərin CSI 300 indeksi günortaya doğru 0,3% enib, Honq Konq Hang Seng indeksi isə 0,6% düşüb.
“Goldman Sachs” analitikləri ABŞ-ın gömrük tariflərini 20 faiz artıracağı halda yuanın məzənnəsinin 7,50 səviyyəsinə düşəcəyini proqnozlaşdırırlar. Bununla belə, Çin hökumətinin daxili stimullaşdırıcı tədbirlər görəcəyi təqdirdə yerli səhmlərin qiymətində artım olacağını da gözləyirlər.
