Pekin ikili təyinatlı məhsullara ixrac nəzarətini sərtləşdirdikdən sonra Çindən Yaponiyaya nadir torpaq elementləri və digər kritik əhəmiyyətli metallar da daxil olmaqla faydalı qazıntıların tədarükü demək olar ki, tamamilə dayanıb. Kyodo News-un iki ölkənin xarici ticarət məlumatlarına istinadən verdiyi xəbərə görə, iqtisadi tədbirlər Çin və Yaponiya arasında diplomatik qalmaqal fonunda daha da güclənir.
Son illərdə Pekin azı 16 növ mineralın ixracını məhdudlaşdırıb. Onların arasında elektromobillərin və silahların istehsalı üçün zəruri olan yeddi növ nadir torpaq elementi də var. Yanvar ayından etibarən yüksək məhsuldarlıqlı daimi maqnitlərin istehsalı üçün istifadə olunan disprozium və terbiumun Yaponiyaya ixracı dayandırılıb. Sanksiyalar səbəbindən nadir torpaq maqnitlərinin ixracı may ayında aprellə müqayisədə 35% azalıb. Bundan əlavə, Pekin raket istehsalı üçün molibden tozunun, patron istehsalında istifadə olunan sürməli qurğuşunun, eləcə də bəzi volfram və qallium məmulatlarının tədarükünü dayandırıb.
Çin yanvarın 6-da Tayvanla bağlı Yaponiyanın baş naziri Sanae Takaitinin 2025-ci ilin noyabrında verdiyi bəyanatlardan sonra Tokioya qarşı sərt məhdudiyyətlər tətbiq edib. İyunun sonunda Çin daha 20 Yaponiya təşkilatını, o cümlədən Milli Müdafiə Tədqiqatları İnstitutunu və Mitsubishi Electric Corp.-un törəmə şirkətlərini qara siyahıya salıb. Hazırda siyahıda ümumilikdə 40 təşkilat və şirkət yer alır.
İki ölkə arasında münasibətlər Takaitinin 2025-ci ilin noyabrında Tayvan ətrafındakı böhranı “ekzistensial təhlükə” adlandıraraq Tokionun “kollektiv özünümüdafiə hüququndan” istifadə edə biləcəyini bildirməsindən sonra gərginləşib. Çin hakimiyyəti bu açıqlamaları ölkənin daxili işlərinə müdaxilə kimi qiymətləndirib.
