TerraUSD steyblkoinin sabitliyini qorumaq üçün yaradılmış “Luna Foundation Guard” təşkilatı, tokenin dəyərini qorumaq üçün keçən həftə bitkoinlərin demək olar ki, bütün mövcud ehtiyatlarını istifadə etdiyini açıqlayıb. Qeyd edək ki, LFG-nin sərəncamında dəyəri 3 milyard dollardan çox olan 80 min bitkoin olub.
Xatırladaq ki, TerraUSD dollara bağlıdır. Dollara nisbətdə paritet aşağıdakı alqoritmlə təmin edilir: sikkənin dəyəri 1 dollardan aşağı düşdükdə əlavə Luna tokeni buraxılır. Və bu prosedur TerraUSD-nin məzənnəsi yenidən 1 dollara qalxana qədər davam edir.
Mövcud məlumata görə, LFG keçən həftə TerraUSD 1 dollardan aşağı düşdükdən sonra 52 189 bitkoin satıb. Steyblkoini çöküşdən xilas etmək istəyən şirkət son cəhdlə daha 33 206 bitkoini əldən verib. Bununla belə, bu kömək etməyib – hazırda TerraUSD 0.1 dollara satılır.
İndi LFG-nin ehtiyatında cəmi 313 bitkoin qalıb. Mənbənin sözlərinə görə, təşkilat qalan aktivlərdən bəzi TerraUSD sahiblərinin itkilərini kompensasiya etmək üçün istifadə etmək niyyətindədir.
