İsveçrənin UBS bankı Global Wealth Report 2026 hesabatında dollar milyonçularının artım tempinə görə lider ölkələri sadalayıb. Reytinqə Litva başçılıq edib. Bu ölkədə dollar milyonçularının sayı 8% artıb. Sonrakı yerlərdə Türkiyə (+6,4%), Latviya (+5,7%) və Macarıstan (+5,3%) qərarlaşıb. Rusiya 2025-ci ilin yekunlarına əsasən dollar milyonçularının sayının artım tempinə görə dünyada beşinci yeri tutub.
Hesabata əsasən, Rusiyada dollar milyonçularının sayı il ərzində 5,2% artaraq 447 min nəfərə çatıb. Bu göstərici ilə ölkə milyonçuların ümumi sayına görə dünya reytinqində 18-ci yerdə qərarlaşıb.
Hesabatda qeyd olunur ki, dünyada dollar milyonçularının sayı ümumilikdə 1,5% artıb. Bu isə il ərzində təxminən 1 milyon yeni milyonçunun meydana çıxması, yəni hər gün 2,6 mindən çox insanın bu kateqoriyaya qoşulması deməkdir.
Dollar milyonçularının ümumi sayına görə isə ABŞ açıq fərqlə lider olaraq qalır. Ölkədə 23,6 milyondan çox milyonçu yaşayır ki, bu da dünyadakı 57,5 milyon dollar milyonçusunun 40%-dən çoxunu təşkil edir.
Qərbi Avropada təxminən 15 milyon dollar milyonçusu yaşayır ki, bu da qlobal göstəricinin 25%-nə bərabərdir. Asiya-Sakit okean regionunda isə lider Çindir — burada 5,3 milyon dollar milyonçusu var. İkinci yerdə isə təxminən 3 milyon milyonçu ilə Yaponiya qərarlaşıb.
