İqtisadçıların fikrincə, prezidentin addımları Federal Ehtiyat Sisteminə (FES və ya FED) olan etimadı sarsıda və uzunmüddətli inflyasiya ilə faizlərin artımına gətirə bilər. Banker.az xəbər verir ki, bu barədə “Financial Times” yazır.
Donald Tramp FES-in faizləri üç bənd endirib 1,25–1,5 %-ə salmasını tələb edib, sədr Cerom Pauelli isə “inadkar qatır” və “axmaq” adlandırıb. O, həmçinin FES-in rəhbərliyində dəyişikliklərə başlayıb – idarə heyətinin üzvü Liza Kuk ipoteka müraciətlərində yanlış məlumat verməkdə ittiham olunaraq vəzifədən uzaqlaşdırılıb. L.Kuk məhkəmədə qərarı mübahisələndirmək niyyətindədir.
Tramp artıq öz tərəfdarlarını əsas vəzifələrə irəli sürür: Stiven Miranı yeni namizəd göstərib, Mişel Bouman və Kris Uoller isə onun ilk prezidentlik dövründə təyin edilib. Bu, FES-də çoxluq balansını dəyişə bilər. Pauel 2026-cı ilə qədər sədrlikdə qalacağını açıqlasa da, mandatının sonrakı taleyi qeyri-müəyyəndir.
“JPMorgan”dan Priya Misra bildirib ki, FES-in müstəqilliyinin itirilməsi dolların zəifləməsi və inflyasiyanın yüksəlməsinə gətirib çıxarar. “RBC Capital Markets”dən Bleyk Qvinn isə xəbərdarlıq edib ki, pul-kredit siyasətini prezident müəyyən etməyə başlayır.
Bazar reaksiyası da güclənib: ikiillik və 30 illik ABŞ istiqrazlarının gəlirliliyi fərqi son üç ilin maksimumuna çatıb, dollar 0,2% ucuzlaşıb.
Ekspertlər hesab edirlər ki, uzunmüddətli faizlərin artımı fonunda FES yenidən istiqraz alış proqramlarına müraciət edə bilər. Tramp və FES isə bildiriblər ki, məhkəmə qərarına əməl olunacaq.
