2022-ci ilin ilk səkkiz ayı ərzində Azərbaycan Respublikası Maliyyə Nazirliyinin xətti ilə fond bazarında vəsait cəlbi kəskin azalıb.
Bu barədə Banker.az-a BFB-dən (Bakı Fond Birjası) bildirilir.
Fond birjasının ilkin məlumatlarına əsasən, hesabat dövründə cəmi 841.66 milyon manatlıq dövlət istiqrazları emissiya edilib. Bu isə 2021-ci ilin müvafiq dövründən 34 faiz zəif nəticədir.
BFB-dən bildirilir ki, həmin dövrdə cəmi 232 əqd bağlanıb.
Dövlətin digər qiymətli kağızı sayılan Mərkəzi Bank notlarının əməliyyat həcmi 3 milyard 494.68 milyon manat olmuşdur. Bu öncəki ildə 3 milyard 795.39 milyon manat idi.
Dövlət qiymətli kağızlarının ümumi əməliyyat həcmi 4 milyard 336.35 milyon manat olub.
