Amerikanın neft-qaz korporasiyası “ExxonMobil”in baş icraçı direktoru Darren Vuds bildirib ki, İranda baş verən müharibə səbəbindən neft qiymətləri artmağa davam edəcək.
O, CNBC telekanalına müsahibəsində qeyd edib ki, mövcud qiymətlər neft tədarükündəki fasilələrin miqyasını tam əks etdirmir.
“Əksəriyyət üçün aydındır ki, görünməmiş fasilələri nəzərə alsaq, bazar hələ də nəticələri tam hiss etməyib”, — deyə Darren Vuds bildirib.
Onun sözlərinə görə, Hörmüz boğazı bağlı qaldığı müddətdə neft qiymətləri artmağa davam edəcək. Lakin boğaz açıldıqdan sonra belə, Yaxın Şərqdən neft tədarükünün normallaşması bir-iki ay çəkəcək.
Cənab Vuds qeyd edib ki, qiymətlərin müəyyən qədər sabit qalmasına böhranın başlanğıcında çox sayda neft tankerinin yolda olması təsir göstərib. Bundan əlavə, bir çox ölkə və şirkətlər tərəfindən böyük həcmdə ehtiyatların bazara buraxılması da kömək edib.
İranda müharibənin başlanmasından bəri dünya neft qiymətləri təxminən 60% artıb.
