2025-ci ildə avro dollar qarşısında 14% bahalaşaraq son 4 ilin maksimum səviyyəsinə çatıb.
Banker.az xəbər verir ki, bu barədə “Financial Times” yazır.
İnvestorların ABŞ-dakı siyasi qeyri-müəyyənlikdən qaçaraq Avropa aktivlərinə üz tutması bu güclənməni dəstəkləyib. Bununla belə, Avropa Mərkəzi Bankı daxilində güclü avronun mənfi təsirləri ilə bağlı narahatlıqlar artır.
Normalda daha aşağı faiz dərəcəsi olan valyutalar zəifləyir, lakin ABŞ və Avropa arasındakı faiz fərqinə baxmayaraq, avro bahalaşmaqda davam edir. ECB vitse-prezidenti Luis de Qindos bildirib ki, 1,20 dollar səviyyəsindən yuxarı məzənnələr problemli ola bilər.
Güclü avro idxalı ucuzlaşdıraraq inflyasiyanı azaldır, lakin Avropanın ixrac yönümlü iqtisadiyyatı üçün çətinlik yaradır. ABŞ-dan mümkün ticarət tariflərinin artımı fonunda bu risklər daha da güclənir.
ECB daxilində bəzi rəsmilər artıq “verbal müdaxilə” zərurətindən danışır. Ekspertlər isə bildirirlər ki, sürətli bahalaşma, idarəçilərin gözlədiyindən daha erkən investor axını ilə bağlıdır.
Əgər avro 1,25 dollara yüksələrsə, ECB-nin faizləri yenidən endirəcəyi gözlənilir. İyun 2024-dən bu yana faizlər 2%-ə qədər azaldılıb.
Avrozona 2%-lik inflyasiya hədəfinə çatsa da, 2026-cı ildə bu göstərici 1,6%-ə enə bilər. Bu isə deflyasiya riski yaradır. ECB-nin məzənnəyə müdaxilə imkanları isə məhduddur və hər hansı yanlış addım valyuta müharibəsi ilə nəticələnə bilər.
Avro-dollar məzənnəsi/ FOTO: İnvestAZ İ.Ş. MT4 (günlük qrafik)
