Fransada enerji təminatçıları istehlakçıları qənaət etməyə təşviq etmək üçün qərara gəliblər ki, elektrikdən az istifadə edənləri bonuslar və ya endirimlərlə mükafatlandırsınlar.
Banker.az bu barədə xarici mediaya istinadən xəbər verir.
Qeyd edək ki, Paris administrasiyası elektrik təchizatı şirkətlərindən tələb etmişdi ki, məişət enerji istehlakını azaltmağa təşviq edən proqramlar həyata keçirsinlər. Hökümətin bu tələbindən sonra əsas enerji təminatçılarından olan “Engie” və “TotalEnergies” şirkətləri ən az elektrik istehlak edən müştərilərinə bonus və endirim təkliflər edəcəklər.
“Engie” 2022-ci ilin oktyabr-2023-cü ilin aprel aylarını əhatə edən qış dövründə kampaniyada iştirak edəcək. Şirkət gündəlik istehlakını müəyyən qədər azaldan müştərilərinə ödənişlər edəcək.
“TotalEnergies” şirkətinin müştəriləri isə 1 noyabr 2022-ci il və 31 mart 2023-cü il tarixləri arasında istehlaklarını ən azı 5% azaldacaqları təqdirdə aprel ayı hesablarına 30-
120 avro arasında endirim əldə edəcəklər.
