“Bank of America” və “Barclays” analitikləri gözləyirlər ki, hazırda təxminən $1.3416 səviyyəsində ticarət olunan funt ilin sonuna qədər $1.35-ə qədər yüksələcək. “Goldman Sachs” isə növbəti 12 ay ərzində qiymətin $1.40 səviyyəsinə çatacağını proqnozlaşdırır.
Banker.az-ın İnvestisiya bölməsi bildirir ki, bu il funt sterlinq on ən populyar valyuta arasında ən yaxşı nəticə göstərən valyuta olub. Aprelin sonundan qısa müddət ərzində $1.23 səviyyəsindən eniş etdikdən sonra o, əhəmiyyətli dərəcədə artıb. Ümumilikdə, ilin əvvəlindən GBP dollara nisbətdə 5%-dən çox, avroya nisbətdə isə 4%-dən çox bahalaşıb.
Ticarət çəki indeksinə əsasən, funt 2016-cı ildə Böyük Britaniyanın Avropa İttifaqından çıxmaq üçün keçirilən səsvermədən bəri ən yüksək səviyyədədir və referendum ərəfəsindəki səviyyədən cəmi 2% aşağıdır. Artımın səbəbi Böyük Britaniyada xidmət sektorunda inflyasiyanın yüksək olmasına və gözlənilməz dərəcədə davamlı iqtisadiyyata görə, faiz dərəcələrinin digər ölkələrə nisbətdə daha yüksək səviyyədə qalacağı gözləntilərdir.
“Ümumi mənzərə belədir: Böyük Britaniya gözləniləndən daha yaxşı nəticələr göstərdi, İngiltərə Bankı digər mərkəzi banklara nisbətdə siyasətini daha yavaş yumşaldır və Aİ ilə münasibətlər yaxşılaşır”, – deyə “Bank of America”nın G10 valyuta strategiyası üzrə qlobal rəhbəri Afanasios Vamvakidis “The Financial Times”a bildirib.
FAİZLƏR HƏR ŞEYİ HƏLL EDİR
Bankların optimist proqnozları funtun dollara nisbətdə 0.7% artması ilə üst-üstə düşüb və bu da onu iki yarım illik ən yüksək səviyyəyə çatdırıb.
“Biz bir neçə ay ərzində tədricən funt üçün hədəf səviyyəmizi artırırıq və bu, bizim bu valyutaya olan optimist baxışımızı əks etdirir”, – deyə “Goldman Sachs”ın qlobal valyuta bölməsinin rəhbəri Kamakaşya Trivedi bildirib.
Son aylar investorlar böyük ölkələrin pul siyasəti ilə bağlı proqnozları yenidən nəzərdən keçirirlər və ABŞ Federal Ehtiyat Sistemindən ABŞ iqtisadiyyatının yavaşlamasına dair əlamətlərə görə, daha aktiv yumşalma gözlənilir. Avrozona üçün isə proqnozlara əsasən, faiz dərəcələri Böyük Britaniyaya nisbətdə daha sürətlə aşağı düşəcək.
Federal Ehtiyat Sistemi və Avropa Mərkəzi Bankı bu il artıq faiz dərəcələrini yarım faiz bəndi aşağı salıblar və gələn ilin mart ayına qədər faiz dərəcələrinin müvafiq olaraq daha 1.4% və 1% aşağı düşəcəyi gözlənilir.
Bu arada, İngiltərə Bankı avqust ayında faiz dərəcələrini cəmi 0.25 faiz bəndi aşağı salıb və növbəti altı ay ərzində daha üç və ya dörd belə endirim gözlənilir. Mərkəzi bank inflyasiyanı artırmamaq üçün tələsmir. Avqust ayında inflyasiya hədəf səviyyəsi olan 2.2%-ə yaxın olub, lakin İngiltərə Bankının daxili qiymət təzyiqlərinin əlaməti kimi diqqətlə izlədiyi xidmət sektorunda inflyasiya 5.6%-ə yüksəlib.
“İnflyasiya doğru istiqamətdə hərəkət edir, lakin hələ də Avrozona və ABŞ-dən daha yüksəkdir”, – deyə Vamvakidis bildirib. “Bu o deməkdir ki, İngiltərə Bankı siyasəti daha yavaş yumşaldacaq”.
İQTİSADİ ARTIM VƏ PROQNOZLAR
Avqust ayında Böyük Britaniyanın özəl sektor fəaliyyətində gözləniləndən daha böyük artım müşahidə edilib və dörd aylıq maksimuma çatıb. İqtisadi Əməkdaşlıq və İnkişaf Təşkilatı (OECD) çərşənbə günü dərc etdiyi hesabatda bildirib ki, Böyük Britaniya dünyanın ən böyük iqtisadiyyatları arasında artıma liderlik edəcək.
OECD Böyük Britaniyanın ümumi daxili məhsulunun (ÜDM) 2024-cü ildə 1.2%, 2025-ci ildə isə 1% artacağını gözləyir. Parisdə fəaliyətdə olan təşkilat ABŞ iqtisadiyyatının bu il 2.6% artacağını proqnozlaşdırır, Almaniya iqtisadiyyatı isə 0.1% səviyyəsində geriləyəcək. “Barclays” bankında valyuta strategiyası üzrə mütəxəssis Lefteris Farmakis FT-yə bildirib ki, Böyük Britaniyanın nisbətən dayanıqlı iqtisadiyyatı və deflyasiya prosesinin yavaş tempi bankın funt üzrə optimist baxışını dəstəkləyir.
O həmçinin qeyd edib ki, Leyboristlər Partiyası hökumətinin Aİ və Böyük Britaniya arasında daha sıx əlaqələrə can atmaq niyyəti “Brexit funtu üzrə risk premiyasını daha da azaldaraq pozitiv təklif şoku kimi çıxış edə bilər.
İNVESTORLARIN ŞÜBHƏLƏRİ
Bəzi investorlar düşünürlər ki, funt üçün “buğa (bull) impulsu” tezliklə zəifləyəcək.
“Mən son altı ay ərzində ümumilikdə funta müsbət yanaşırdım, lakin indi məni bir qədər narahat edən səviyyələrə yaxınlaşırıq”, – deyə “BNY” valyuta strateqi Ceff Yu bildirib.
Dünyanın ən böyük banklarından biri olan “State Street”in makrostrateji üzrə rəhbəri Maykl Metkalf bildirib ki, aktivlərin idarəçiləri ümumilikdə funta qarşı “neytral” mövqedədirlər.
