Banker.az monitorinq qrupu bugünkü araşdırmasında çox maraqlı və spesifik bir mövzuya toxunub. Bildiyimiz kimi, debet kart məhsulu bütün Banklarda təklif edilən kütləvi Bank məhsullarından hesab edilir. Bütün Banklarda təklif edilməsinə baxmayaraq bəzi Banklarda bu məhsul özünün spesifik özəllikləri və üstünlükləri ilə ön plana çıxır. Qeyd edilən özəlliklərdən “cash-back” və “ bonus” funskiyası, komissiyasız nağdlaşma funksiyası, kartı illik xidmət haqqı ödəmədən əldə etmək funskiyası və s. haqqında bir neçə dəfə araşdırmalarımız olub və bu məlumatları Sizlərlə bölüşmüşük. Bugünkü yazımızda isə biz debet kartlara bəzi Banklar tərəfindən əlavə edilmiş “depozit” funksiyası haqqında danışacağıq.

Depozit funksiyası – kart hesabında olan qalıq vəsaitə bank tərəfindən müəyyən edilmiş illik faiz dərəcəsi gəlir hesablanmasıdır. Sadə dillə izah etsək, pulunuzu cibinizdə deyil kart hesabınızda saxladığınıza görə əlavə gəlir əldə etmək imkanıdır. Bu funksiya barmaqla sayılacaq qədər az Bankda və bankların bütün kartlarında deyil də bir və ya bir neçə kartında mövcuddur. Valyuta, minimal qalıq məbləği, illik faiz dərəcəsi və s. xüsusiyyətlər hər bankda fərqli olduğundan araşdırma nəticəsində əldə etdiyimiz məlumatları müqayisəli şəkildə Sizə təqdim etmək istədik. Aşağıdakı cədvəldə qeyd edilən məlumatlarda tanış ola bilərsiniz.