İran ətrafında vəziyyətin növbəti dəfə gərginləşməsi fonunda Honkonq Fond Birjasında səhmlərin qiymətləri eniş nümayiş etdirib. Birjanın əsas göstəricisi olan Hang Seng indeksi ticarətin sonunda 304,89 bənd və ya 1,22% azalaraq 24 657,06 bəndə düşüb. Bu, martın 30-dan bəri qeydə alınan ən aşağı göstəricidir.
Digər indekslər də mənfi dinamika göstərib. Materik Çinin Honkonqda listinq olunan şirkətlərinin səhmlərinin ümumi performansını əks etdirən Hang Seng China Enterprises Index 95,27 bənd (1,13%) azalaraq 8 341,36 bəndə enib.
Ən böyük faiz itkisi isə 30 ən iri texnologiya şirkətinin səhmlərini izləyən Hang Seng Tech indeksində qeydə alınıb. İndeks 132,48 bənd və ya 2,71% azalaraq 4 755,91 bənd səviyyəsinə düşüb.
Honkonq birjasına yaxın mənbənin sözlərinə görə, investorlar İranla bağlı son xəbərlər fonunda narahatlıq keçirirlər.
“İnvestorlar bu gün İranla bağlı məlumatları diqqətlə izləyirlər və Yaxın Şərqdən gələn xəbərlər ənənəvi olaraq fond bazarındakı əhval-ruhiyyəyə təsir göstərir”, – deyə agentliyin həmsöhbəti bildirib.
