ABŞ birjalarında 14 iyul tarixində keçirilən ticarətin yekunlarına əsasən, IBM şirkətinin səhmləri 25,2% ucuzlaşıb. Nəticədə şirkətin bazar dəyəri cəmi bir gün ərzində 69 milyard dollar azalaraq 204 milyard dollara düşüb. Bu, 1960-cı illərin sonundan bəri IBM üçün ən böyük gündəlik eniş olub.
Səhmlərin kəskin ucuzlaşmasına şirkətin baş direktoru Arvind Krişnanın ikinci rüb üzrə maliyyə nəticələrinin gözləniləndən zəif olacağını açıqlaması səbəb olub. Şirkət bunu istehlakçı və korporativ müştərilərin tələbində baş verən dəyişikliklərlə izah edib və IBM-in bu dəyişikliklərə hazır olmadığını bildirib.
The Wall Street Journal tərəfindən sorğulanan ekspertlərin sözlərinə görə, Nvidia, Google və Oracle kimi şirkətlər çiplər və şəbəkə avadanlıqları satmaqla, eləcə də hesablama güclərini icarəyə verməklə faydalanarkən, IBM əsasən korporativ müştərilərin öz infrastrukturunda quraşdırdığı aparat və proqram sistemlərinin satışına fokuslanır.
“İyunun son həftələrində müştərilərin kapital xərclərini serverlər, məlumat saxlama sistemləri və operativ yaddaşın alınmasına yönəltdiyini müşahidə etdik. Bu dinamika onların alış seçimlərinə təsir göstərdi. Təchizat zəncirimizə müəyyən təsir gözləyirdik, lakin kapital xərclərinin bu qədər genişmiqyaslı şəkildə yenidən bölüşdürüləcəyini proqnozlaşdırmamışdıq”, — deyə Arvind Krişna bildirib.
IBM-in 2026-cı ilin ikinci rübü üzrə maliyyə hesabatının 22 iyul tarixində açıqlanması planlaşdırılır.
