İlin ən uğursuzları – 2023-cü ildə kimlər “Forbes”dən çıxıb?

2023-cü il milyarderlər üçün uğursuz il olub: dünyada gərgin geosiyasi vəziyyət yaranıb, inflyasiya durmadan artır, kriptovalyuta “köpüyü” isə partlamaq üzrədir. Qlobal miqyasda 2640 milyarderin təxminən yarısı 2022-ci illə müqayisədə daha yoxsul olub, lakin bəziləri ondan da pis vəziyyətdədir: 254 nəfər “Forbes” reytinqindən tamamilə çıxıb.

2023-cü il milyarderlər siyahısındakı yerini itirənlər arasında Kanye Uest və Sem Benkman-Frid kimi məşhur simalar, eləcə də böyük brendlərin arxasında duran maqnatlar var. Ən çox itirən İT maqnatları olub, çünki bu kateqoriyada son bir il ərzində 52 nəfərin hər birinin sərvəti 1 milyard dollardan aşağı düşüb.

“Forbes” reytinqindən çıxan milyarderlərin sayına görə birinci yerdə Çindir – 80 nəfər. İkinci yerdə adətən milyarderlərin sayına görə liderlik edən ABŞ dayanır – 47 nəfər. Növbəti pillərdə Hindistan (23) və Cənubi Koreya (15) dayanır.

Aşağıda son bir ildə ən çox itirən və milyarderlər klubundan ayrılan insanlar verilmişdir, hesablamalar 10 mart 2023-cü il tarixinə olan maliyyə göstəricilərinə əsaslanır:

1. Sem Benkman-Frid (indiki sərvəti – 10 milyon dollar, əvvəlki sərvəti – 24 milyard dollar);
2. Kanye Uest (indiki sərvəti – 400 milyon dollar, əvvəlki sərvəti – 2 milyard dollar);
3. İvon Şuinar (indiki sərvəti – 100 milyon dollar, əvvəlki sərvəti – 1.2 milyard dollar);
4. Zhao Veyquo (indiki sərvəti – 100 milyon dollar, əvvəlki sərvəti – 2.8 milyard dollar);
5. Enrike Dubuqras və Pedro Françeski (indiki sərvətləri – hər birində 900 milyon dollar, əvvəlki sərvətləri – 1.5 milyard dollar);
6. Stiv Koin və Nirac Şah (indiki sərvətləri – hər birində 600 milyon dollar, əvvəlki sərvətləri – 1.6 milyard dollar);
7. Aleks Atallah və Devin Finzer (indiki sərvətləri – hər birində 600 milyon dollar hər birində, əvvəlki sərvətləri – 2.2 milyard dollar);
8. Ernest Qarsiya III (indiki sərvəti – 100 milyon dollardan aşağı, əvvəlki sərvəti – 3.2 milyard dollar).

2022-ci ildə milyarderlərin reytinqi 74 debütantla tamamlanıb, lakin onlar 2023-cü ilə qədər siyahıda qala bilməyiblər. Onlar arasında fintex startap “Upstart”ın yaradıcısı David Jiruar, sintetik almaz istehsalçısı Şao Zenqminq və Hindistan əczaçılıq imperiyası “Suven”in qurucusu Subba Rao Casti olub.