“Tesla”nın sahibi İlon Mask şirkətdəki payını azaltmağa davam edir.
Banker.az xəbər verir ki, verilən məlumata görə, sahibkar daha 1.5 milyard dollarlıq səhm satıb.
ABŞ-ın Qiymətli Kağızlar və Mübadilə Komissiyasının (SEC) təqdim etdiyi sənədlərə əsasən, Mask 2.15 milyon qiymətli kağız alışını həyata keçirdikdən sonra noyabrın 23-də 934 min səhm satıb.
Noyabrın 8-də Mask sosial şəbəkədə sorğu keçirib və izləyicilərindən səhmləri satmaq əleyhinə və ya leyhinə səs verməyi xahiş edib. Qeyd edək ki, sorğuda iştirak edənlərin (3.5 milyon insan) 58%-i bu qərarı dəstəkləyib.
“Tesla” səhmləri noyabrın 8-dən bəri 9% ucuzlaşıb. Çərşənbə axşamı onların dəyəri daha 4.1% azalıb.
“The Wall Street Journal”un hesablamalarına görə, Mask “Tesla” səhmlərini satdığı üçün 3.5 milyard dollar vergi ödəməli olacaq. Ümumilikdə, səhmlərin ucuzlaşması milyarderə təxminən 480 milyon dollar qənaət edib.
