Amerikanın “Intel” şirkəti baş direktorunu dəyişdirir.
Banker.az bu barədə xarici KİV-ə istinadən xəbər verir.
Bildirildiyi kimi, 15 fevraldan prosessor və kompüterin digər komponentlərinin istehsalçısı olan şirkətə Patrik Gelsinger rəhbərlik edəcək.
Qeyd edək ki, hal-hazırda Gelsinger virtualizasiya üçün proqram təminatını istehsal edən “VMware” şirkətinə rəhbərlik edir. Və o, texnologiya sahəsində 40 ildən artıq təcrübəyə malikdir.
CEO-nun dəyişməsi ilə bağlı xəbərin fonunda NASTAQ birjasında “Intel” səhmləri 8.5% artaraq 57.75 dollar səviyyəsinə çatıb. Ümumilikdə, əvvəlki ticarət sessiyası ilə müqayisədə artım demək olar ki, 12% təşkil edib. Bununla yanaşı, Nyu-York birjasında “VMware” səhmlərinin 5% azalaraq 134.5 dollara düşməsi müşahidə edilib.
“Intel”in indiki baş direktoru Bob Svon bu vəzifəyə 2019-cu ilin yanvarında gəlib və texniki təhsilə sahib olmadığına görə dəfələrlə tənqidlə üzləşib. Mütəxəssislər həmçinin Svonun rəhbərliyi altında “Intel”in rəqiblərindən bir neçə zərbə aldığını da qeyd edirlər – 2020-ci ildə şirkətin səhmləri 19% ucuzlaşıb.
“Intel”in əsas səhmdarlarından biri və “Third Point” hedge-fondunun qurucusu Daniel Leb, Svonun vəzifədən uzaqlaşdırılmasını “səhmdarların mənafeyi baxımından etibarlı bir addım” adlandırıb. Bundan əvvəl təşkilat nümayəndələri şirkəti “AMD”, “Samsung” və “TSMC” kimi rəqiblərə güzəştə getməkdə günahlandırmışdılar.
