Avropa Mərkəzi Bankı (ECB) İran müharibəsinin enerji qiymətləri üzərindən inflyasiyanı artırması fonunda bu il ikinci dəfə faiz dərəcəsini yüksəldib.
Banker.az bunu ECB-nin press-relizinə istinadən xəbər verir.
ECB uçot dərəcəsini 2,25%-dən 2,50%-ə çatdırıb və inflyasiyanın bir müddət 2%-lik hədəfdən yuxarı qalacağını bildirib.
Avqustun sonundan etibarən ABŞ və İran arasında hərbi, gəmiçilik və enerji obyektlərinə qarşı hücumların yenidən intensivləşməsi neft qiymətlərini 100 dolların üzərinə qaldırıb. Bu isə enerji idxalından asılı avrozonada qiymət artımlarının yenidən sürətlənməsi ilə bağlı narahatlığı artırıb.
ECB həmçinin iqtisadi artım və inflyasiya proqnozlarını yüksəldib. Bank bu il avrozonada inflyasiyanın 3%, gələn il 2,5%, 2028-ci ildə isə 2,1% olacağını gözləyir. Bununla belə, yeni proqnozlar son enerji qiyməti artımını, xüsusilə də Avropanın istilik məqsədilə geniş istifadə etdiyi təbii qazın bahalaşmasını tam əks etdirməyə bilər.
Maliyyə bazarları bu il daha bir faiz artımı, gələn il isə bir və ya iki əlavə artım gözləyir. İqtisadçıların bir hissəsi isə son qərarın hələlik sonuncu artım ola biləcəyini düşünür. ECB gələcək qərarlarla bağlı konkret siqnal verməyib və siyasətin daxil olan məlumatlardan asılı olacağını bildirib.
Bank avrozonanın iqtisadiyyatının 2026-cı ildə 0,9%, 2027-ci ildə 1,4%, 2028-ci ildə isə 1,5% böyüyəcəyini proqnozlaşdırır. Bununla yanaşı, uzunmüddətli istiqraz gəlirliliklərinin qlobal maliyyə böhranından əvvəlki səviyyələrə yüksəlməsi və dövlət borcları ilə bağlı narahatlıqlar maliyyələşmə şərtlərini sərtləşdirir.
ECB prezidenti Kristin Laqardın qərardan sonra keçirdiyi mətbuat konfransında faiz siyasəti ilə yanaşı, 2027-ci ilədək davam etməli olan prezidentlik müddəti ilə bağlı suallarla da üzləşəcəyi gözlənilir.
Bu xəbərin ardından EUR/USD məzənnəsi beyəlxalq foreksdə 1.16 səviyyəsindən də aşağı düşüb. Sonradan itkinin bir hissəsini bərpa edə bilib.
