İran uranı 84% zənginləşdirdiyinə dair xəbərləri təkzib edib.
Bu barədə İranın Atom Enerjisi İnstitutunun sözçüsü Bəhruz Kamalvəndi deyib.
“İndiyədək biz uranı 60%-dən çox zənginləşməyə cəhd etməmişik. 60% zənginləşdirmədən yuxarı hissəciklərin olması, onun bu faizdən yuxarı zənginləşdirmə ilə istehsal demək deyil”, – Kamalvəndi bildirib.
Qeyd edək ki, “Bloomberg News”un verdiyi xəbərə görə, AEBA İranda ötən həftə 84% zənginləşdirilmiş uran aşkar edib.
Kamalvəndi xəbəri “böhtan” adlandırıb və faktların təhrif edildiyini bildirib.
İran 2021-ci ilin aprel ayından uranı 60%-ə qədər zənginləşdirib. Üç ay əvvəl isə Fordo zavodunda da uranın zənginləşdirilməsinə başlanıb.
Qeyd edək ki, nüvə silahlarında saflıq dərəcəsi təxminən 90% olan urandan istifadə edilir.
