İxracatçılar klubunun növbəti iclası keçirilib. İclasda növbəti iclasın Qətərin Doha şəhərində təşkil edilməsi ilə bağlı qərar qəbul edilib.
Bu barədə Banker.az-a İqtisadiyyat Nazirliyinin mətbuat xidmətindən bildirilib.
İclas çərçivəsində “Birinci Beynəlxalq Məhsullar Sərgisin”də iştiraka dair yerli şirkətlərin nümayəndələri ilə müzakirələr aparılıb. İqtisadiyyat Nazirliyinin dəstəyi və AZPROMO-nun təşkilatçılığı ilə keçirilmiş tədbirdə qida, sənaye, xidmət, İKT və digər sektorlarda fəaliyyət göstərən 30-dan çox şirkətin təmsilçisi iştirak edib.
Azərbaycan İxracatçılar Klubunun icraçı direktoru Zöhrab Qədirovun iştirakı ilə təşkil olunmuş iclasda “Made in Azerbaijan” brendinin təşviqi, ixracın coğrafiyasının və həcminin genişləndirilməsi istiqamətində müxtəlif xarici ölkələrdə keçirilən sərgilərdə iştirakın əhəmiyyəti vurğulanıb.
İclasda Azərbaycanda qeyri-neft sektorunun inkişafı istiqamətində reallaşdırılan tədbirlər, iqtisadiyyatın şaxələndirilməsi, “Made in Azerbaijan” brendinin təşviqi və bu məqsədlə tətbiq olunan mexanizmlər, biznes mühitinin davamlı olaraq yaxşılaşdırılması istiqamətində görülən işlər, eləcə də Azərbaycan İxracatçılar Klubunun fəaliyyəti və kluba üzvlük barədə məlumat verilib, “Birinci Beynəlxalq Məhsullar Sərgisin”də iştirak qaydalarına dair suallar cavablandırılıb.
