“Kəpəz” BOKT MMC 2026-cı ilin birinci rübündə 2.12 mln. manat xalis mənfəət əldə edib ki, bu da illik müqayisədə 14.2% artım deməkdir. Mənfəətdə artım əsasən xalis faiz gəlirlərinin 17.3% yüksəlməsi ilə dəstəklənsə də, kredit zərərləri üzrə ehtiyatların 87.3% artması və inzibati xərclərin 17.8% genişlənməsi artım tempini bir qədər məhdudlaşdırıb.
Banker.az bunu BOKT-nin illik audit hesabatına istinadən xəbər verir.
Hesabat dövründə cəmi gəlirlər 5.64 mln. manata çatıb və illik müqayisədə 16.6% artıb. Eyni dövrdə ümumi xərclər 3.51 mln. manat olub ki, bu da 18.1% artım göstərir.
Şirkətin cəmi aktivləri illik müqayisədə 22.2% artaraq 14.79 mln. manata yüksəlib. Kredit portfeli 14.7% artımla 12.24 mln. manat təşkil edib və cəmi aktivlərin təxminən 82.8%-ni formalaşdırıb (bir il əvvəl 88.1%).
Cəmi öhdəliklər 8.2% artaraq 7.35 mln. manata, cəmi kapital isə 39.9% yüksələrək 7.44 mln. manata çatıb. Bölüşdürülməmiş mənfəət isə 26.5% azalaraq 2.44 mln. manat olub.
Xatırladaq ki, “Kəpəz” BOKT 2013-cü ildə yaradılıb. Onun nizamnamə kapitalı 5 000 000 manatdır. Əbülfəz Əliyev Əlihəsən oğlu BOKT-nin 100% sahibdir.
