Kanada aviaşirkətləri ABŞ və İsrailin İranla münaqişəsi fonunda aviasiya yanacağının bahalaşması səbəbindən reysləri ləğv etməyə başlayıb. Bu barədə CBC telekanalı məlumat yayıb.
Belə ki, Air Transat may-oktyabr ayları üçün reyslərini 6% azaltdığını açıqlayıb. Azalma əsasən Avropa və Karib hövzəsi istiqamətlərinə təsir edəcək və ümumilikdə 1 minə yaxın reysi əhatə edəcək.
WestJet aprel ayında reyslərin 1%-ni, mayda 3%-ni, iyunda isə 6%-ni ləğv edəcək. Air Canada isə Şimali Amerikada iqtisadi baxımdan artıq məqsədəuyğun hesab olunmayan altı marşrutu dayandırdığını bildirib. Bu ixtisar ümumi reyslərin təxminən 1%-nə təsir edəcək.
Bununla belə, sahə üzrə ekspertlər qeyd edirlər ki, Kanadada vəziyyət Avropa ölkələri ilə müqayisədə o qədər də ağır deyil. Belə ki, ölkədaxili uçuşlar üçün istifadə olunan aviasiya yanacağının təxminən 85%-i yerli neft emalı zavodlarında istehsal olunur.
