London və Kiyev Ukrayna ərazisində Britaniya silahları istehsal edəcək birgə müəssisələrin yaradılması imkanını nəzərdən keçirir.
Britaniya hərbi-sənaye kompleksinin yüksəkvəzifəli şəxsləri ukraynalı həmkarları ilə bu cür planları müzakirə edirlər.
Krallığın Müdafiə Nazirliyinin podratçı şirkətində işləyən qəzetin mənbələrindən biri nəşrin əməkdaşlarına bildirib ki, davam edən dialoqun məqsədi Böyük Britaniyanın Ukraynanın Avropa tərəfdaşları arasında müvafiq müqavilələr imzalayan ilk ölkə olmasını təmin etməkdir. Onun sözlərinə görə, hərbi-sənaye kompleksinin bir çox Avropa müəssisələri hazırda Kiyevlə danışıqlar aparır.
Böyük Britaniyanın Müdafiə Nazirliyi və Baş nazir Rişi Sunakın ofisi söhbətin iki ölkənin müdafiə sənayesi ilə məşğul olan şirkətlərinin qarşılıqlı fəaliyyətindən getdiyini əsas gətirərək bu məlumatı şərh etməkdən imtina ediblər.
Nəşr qeyd edib ki, daha öncə Ukraynada ABŞ və İsrail atıcı silahları lisenziya əsasında istehsal olunurdu. İndi Kiyev rəhbərliyi ölkədə Qərb tipli artilleriya qurğuları və zirehli maşınların istehsalını qurmağa çalışır ki, bu da NATO standartlarına keçidi sürətləndirəcək.
