Çərşənbə günü əksər valyutalar Donald Trampın yenidən Ağ Evə qayıtması perspektivi fonunda dəyər itirməsinə baxmayaraq Türk lirəsi dollar qarşısında dəyər qazanan yeganə inkişaf etməkdə olan bazar valyutası (emerging market) olub.
Banker.az xəbər verir ki, bu barədə Bloomberg agenliyi bildirib.
Lirə Bakı vaxtı ilə saat 13:55-də dollar qarşısında 0.3% dəyər qazanıb. Məsələdən məlumatlı treyderlərin bildirdiyinə görə, bu, dövlət banklarının güclü dəstəyi və xarici fondların bazara daxil olmasına təşviqi ilə bağlıdır. Treyderlər, açıqlama verməyə icazə verilmədiyi üçün adlarının açıqlanmasını istəməyib.
Dövlət bankları əsasən Asiya ticarət saatlarında lirəni dollara qarşı 34.3550 səviyyəsində saxlamaq üçün 500 milyon dollardan çox satıb, digər inkişaf etməkdə olan bazar valyutaları isə Trampın qələbə ehtimalı fonunda dəyər itirib. Bu dəstəyi nəzərə alaraq hedc fondları da bazara qoşulub.
“Xaricilər üçün lirə mövqeyinə daxil olmaq məntiqli görünür, çünki “carry trade” (gəlirli ticarət) hələ də cəlbedicidir və digər EM (inkişaf etməkdə olan bazar) valyutalarında dəyişkənlik çox yüksəkdir” – deyə, İstanbulda “MUFG Bank” Türkiye-nin xəzinədarlıq rəhbəri Onur İlgen bildirib. İlgen deyib ki, seçkilərdən əvvəl investorlar Türkiyə prezidenti Rəcəb Tayyib Ərdoğanın Tramp ilə şəxsi münasibətlərindən lirənin faydalana biləcəyini proqnozlaşdırırdılar.
“Carry trade” termini aşağı faiz dərəcəsi olan ölkələrdən borc alaraq, daha yüksək gəlir təklif edən ölkələrdə və valyutalarda investisiya qoyuluşunu ifadə edir. Türkiyədə isə Mərkəzi Bankın əsas faiz dərəcəsi 50%-dir və bu, lirəni dollar qarşısında nisbətən sabit saxlamağa çalışan hökumət tərəfindən daha da cəlbedici hala gətirilib.
Türk istiqrazları və səhmləri də günü inkişaf etməkdə olan bazar rəqiblərini geridə qoyaraq yüksəlişlə tamamlayıb. 10 illik lirə istiqrazlarının gəlirliliyi 13 baza bəndi azalaraq 31%-ə düşüb, əsas səhmlər indeksi isə 3.2%-ə qədər artıb.
Çərşənbə günü lirənin dəyər qazanması dolların son bir ilin ən güclü səviyyəsinə çatması fonunda baş verib. “Bloomberg” dollar indeksi 1.7% artaraq son dörd ildə ən böyük sıçrayışı edib.
“Lirənin inanılmaz dərəcədə yüksək gəliri dolların hərəkətini kompensasiya etmək üçün kifayətdir və buna görə də lirə kursunda əhəmiyyətli bir dəyişiklik görmürük”- deyə, “Union Bancaire Privee Ubp SA”nın Londondakı qlobal valyuta strategiyası rəhbəri Piter Kinsella bildirib.
