06 may 2025-ci il tarixində Bakı Fond Birjasında Azərbaycan Respublikasının Mərkəzi Bankı tərəfindən keçirilmiş repo hərracının nəticələri ötən həftə ilə müqayisədə bəzi mühüm fərqlərlə yadda qalıb.
Banker.az xəbər verir ki, son hərracda repo məbləği 700 milyon manat olaraq elan olunsa da, investorlar tərəfindən verilən sifarişlərin ümumi həcmi 579 milyon manat təşkil edib və bu məbləğ tam şəkildə reallaşdırılıb. Bu isə təklifin tam istifadə olunmaması və investor tələbinin nisbətən zəifləməsinə işarədir. Belə ki, 02 may tarixində keçirilmiş əvvəlki hərracda 600 milyon manatlıq təklif qarşılığında 624.9 milyon manatlıq sifariş verilmişdi və bütün təklif olunan vəsait reallaşdırılmışdı.
Son hərracda minimal, maksimal, kəsmə və orta faiz dərəcəsi 7.24% səviyyəsində qərarlaşıb. Əvvəlki həftədə isə orta faiz göstəricisi 7.23%, minimal isə 7.20% səviyyəsində olmuşdu.
İştirakçıların sayında da azalma müşahidə edilib – 2 may tarixində keçirilmiş hərracda 10 investor və 10 sifariş, 6 may tarixində isə 7 investor və 7 sifariş qeydə alınıb.
