Növbəti dörd il ərzində “Microsoft” İndoneziyada bulud infrastrukturu və süni intellekt layihələrinə 1.7 milyard dollar sərmayə qoymaq niyyətindədir. “Datacenter Dynamics”in məlumatına görə, texnologiya nəhəngi bunun şirkətin yerli hakimiyyət orqanları və biznes qurumları ilə 29 illik əməkdaşlıq tarixində ən böyük investisiya olduğunu açıqlayıb. Bunun yerli hökumətin “Qızıl İndoneziya 2045” təşəbbüsünə nail olmağa kömək edəcəyi və “Microsoft”a regionda bulud xidmətlərinə artan tələbatı ödəməyə imkan verəcəyi gözlənilir.
“Microsoft”un CEO-su Satya Nadellanın sözlərinə görə, yeni nəsil süni intellekt bütün dünyada insanların həyat və iş tərzini yenidən formalaşdıracaq və elan edilmiş investisiyalar, o cümlədən rəqəmsal infrastrukturun genişləndirilməsi, işçi heyətinin hazırlanması və tərtibatçıların dəstəklənməsi İndoneziyanın rifahını təmin edəcək. İndoneziya rəsmilərinin fikrincə, tərəfdaşlıq ölkə üçün həqiqətən də yeni imkanlar açacaq və İndoneziyanı təkcə texnologiya istehlakçısı deyil, həm də qlobal texnoloji təchizat zəncirinə töhfə verən ölkəyə çevirəcək.
“Microsoft” 2021-ci ilin fevralında Cakartada İndoneziyanın bulud bölgəsinin yaradılmasını elan edib və indi Qərbi Yavada məlumat mərkəzləri qurur. Şirkət yeni investisiyaların ölkədəki əvvəlki tikinti layihələri ilə necə əlaqəli olduğunu açıqlamayıb. Bir neçə İndoneziya müəssisəsi artıq “Microsoft”un bulud və süni intellekt həllərindən istifadə edir, o cümlədən fintex şirkəti “Dana”, dövlət dəmir yolu operatoru “PT Kereta Api” və Asiya telekommunikasiya şirkəti “Telkomsel”.
Eyni zamanda, İT nəhənginin rəqibləri var – bir çox bulud şirkəti artıq İndoneziyada fəaliyyət göstərir, o cümlədən “Huawei”, “Google”, “Alibaba”, “Tencent” və AWS. Bu ayın əvvəlində “Indosat” ölkədə 200 milyon dollarlıq süni intellekt mərkəzi tikmək üçün NVIDIA ilə müqavilə bağlayıb. Eyni zamanda, qonşu Malayziya Cənub-Şərqi Asiyanın yeni İT mərkəzi olmağa çalışır.
