Hazırda ölkə əhalimizin əksər hissəsinin maliyyə cəhətdən savadsız olduğunu deyə bilərik. Lakin buradan birbaşa olaraq vətəndaşlarımızın keyfiyyətsiz təhsil aldıqlarını başa düşmək də düzgün deyil. İlk olaraq bankların müştəri maarifləndirilməsi siyasətini yenidən nəzərdən keçirmək lazımdır. Bir çox hallarda fikir ayrılığı borcun ödənməsi vaxtı yetişdikdə yaranır. Məhz bu an müştəri oxumadan imzaladığı müqavilənin şərtləri ilə tanış olmağa başlayır. Üstəlik də, “Müqaviləni imzalamamışdan öncə mütləq oxuyun!” ifadəsinin hər yerdə təkrar edilməsi halında belə.
Bankla müştəri arasında yaranan ikinci ən böyük problem kredit kartından mütəmadi olaraq vəsaitlərin nağdlaşdırılmasıdır. Bu halda müştərini hansı məbləğə kredit faizinin təyin edildiyi, nağdlaşdırma üçün bankın təyin etdiyi komisyon haqqı və s. kimi suallar maraqlandırmır. Buradan isə üçüncü problem, yəni müştərinin ödəmə qabiliyyətinin olmaması problemi ortaya çıxır.
Bu səbəbdən də, hər hansı bir bank və yaxud kredit-maliyyə təşkilatı ilə əməkdaşlıq etməyə hazırlaşarkən heş deyilsə bu təşkilatların iş prinsipləri barədə ilkin məlumatlar əldə edin. Bu səbəbdən də, kredit təşkilatları ilə əməkdaşlığa başlayarkən baza məlumatları əldə etməyə çalışın. Əks halda, bu müəyyən maddi vəsait və əsəblərinizi itirməyə səbəb olacaq.
Bəs banklara maliyyə cəhətdən savadlı və yaxud savadsız müştəri lazımdır?
Əgər birbaşa olaraq cavab verməli olsaq, cavab aydındır. Müştəri məntiqindən çıxış edərək deməli olsaq, müştərinin maliyyə savadsızlığı bank üçün sərfəlidir. Belə ki, maliyyə cəhətdən savadsız müştərini öhdəliklər ilə “yükləmək”, daha sonra isə onların icrasını tələb etmək asandır. Lakin banklar tərəfindən belə bir yanaşma tətbiq edilmir.
Müştərinin maliyyə savadsızlığı yalnızca əlavə problemlərin ortaya çıxmasına səbəb olur.
